[dropcap]А[/dropcap]вгуст зурул 7-нний Дагъусттаннал паччахIлугърал медициналул университетрал ректор Сулайман Маммаев хьунаавкьунни ЕГЭ-лул лахъсса баллу лавсъсса, цалчинмур курсирайн дуклан бувхминнащал.Ва хьунабакьаврий гьуртту хьунни ва университетрал проректор Руслан Шяъбанов, кьамул бай комиссиялул жаваб дулайсса секретарь Илияс АхIмадов, циняв факультетирттал декантал ва студентътурал нитти-буттахъул.
П. Рамазанова
— Вузрал хъуниминнал цIаниятугу, хасну ттула цIаниятугу барчаллагь учин ччай ура, экзаменнал лахъсса баллу бухьувкун, билаятрал медициналул ччимур вузравун буххан хьунсса сантгу дунура, жулвамур вуз язи бугьаврихлу. Итххявхсса, гьунар бусса оьрчIру жучIава дуклантIий бушиву жунгу пахрулунсса ишри, зул лагма лавгун махъми студентъталгу хьхьичIунмай кIункIу-хъит тIунтIиссар.
Вузраву касму ххуйну лахьхьинсса, элмулухун машхул хьунсса циняр шартIру дузал дурну дуссар, жучIа цIанихсса профессортал, преподавательтал зий буссар. Сентябрьданий цIусса столовая зунтIиссар, цIусса кафедра зунтIиссар, мукунма медициналул технологиярттал курс бикIантIиссар. Гьаннайсса, студентътуран къулайсса кIулшивуртту цIакьгу, куртIгу дуллан ччиминнан кумагрансса шартIругу дузал дурну дуссар, — увкунни ректорнал.
Биологиялул ва химиялул 95-98 баллу лавсъсса 16 первокурсникнахьхьун буллунни студентътурал билетру. Вай дарсирдал экзаменнал 100 балл лавсъсса Расул Зайнулаьбидов стоматологиялул факультетрайн кьамул унни.
Педиатриялул факультет къуртал бувсса Севил Бабахановал, цIуну дуклан бувхми барча буллай, кIицI лавгунни вузрал яла ххуйми выпускниктал цIанихсса хIакинтал бушиву ва дуккавриву хIарачат буллалиминнан мудангу ххуллу тIивтIуну бушиву.
Студентка Надира ЛатIиповал ниттилгу барчаллагь увкунни медуниверситетрал администрациялухь, студентътураха дагьайкунсса аякьа душиврухлу. Цинявннал цачIусса суратругу рирщунни хъамакъабитулун, ДГМУ-лул хъунмур корпусрал хьхьичI.
