Ванияр 140 шинал хьхьичI ссивир бувну бивкIминнаясса хавар

Дагъусттаннал тарихраву, хаснува жула лакралмуниву, тарихчитурал тIимунийн бувну, щала мяълумну, балжийну ххал къабивгьумур иширан ккалли буллай бур 1877 шинал Дагъусттаннай хьу­сса бунтирацIун бавхIусса ишру ва танмихI кьувкьуну, ссивир бувминнал бакIрачIан бувкIмур.

---

Гьашину майрай «АиФ-Псков» тIисса кказитрал журналистътал Елена Яземовал ва Анна Овсянниковал макьалартталгу жува тIимур тасттикь буллай бур. Елена Яземова авторсса «Опочкалийн ссивирлив» тIисса цалчинмур макьала чичингу савав хьуну бур, тиккува угу-увну, кулпатгу бувну, сайки 42 шинай Псковуллал аьрщарай ялапар хъанахъисса Гъумучатусса ХIажи Ибрагьимовлул журналисткахь бувсмур. Ваналли вай макьалартту жучIан уттигъанну тIайла дуркссагу.
Телефондалувух ХIажинащал лакку мазрай хьусса ихтилатравагу чIалай бия ва хъинну жула миллатралгу, тарихралгу, ниттил мазралгу къайгъулийсса, дакI цIуцIисса инсан ушиву.
Увну ур ХIажи Гъумучатусса Хъун дяъвилул ветеран, чIярусса шиннардий колхозрал учетчикну зий ивкIсса ХIасан-ХIусайннул ва Кьукниятусса ПатIиматлул кулпатраву. ХIажинал шама уссу ивкIун ур.
Школагу къуртал бувну, ХIажи дуклан увххун ур техникумравун «холодильное» отделениялийн. Дуклай уна, зун тIайла увксса жагьилнан кьисматгу хьуну бур миналул хьун цала буттал буттал ппу увсса Псковуллал аьрщарай. Ваная гьарта-гьарзану жула буккулт­рахь бусан жу икьралгу дуварду ХIажи цува вай гъинтнил гьантрай Ватандалийн увкIсса чIумал.

«Опочкалийн ссивирлив» тIисса макьалалувасса цаппара ххару

«Чансса бакъар Опочкаллал тарихраву аьжаивсса, чIявучин къакIулсса, къабавсса затру. 19-мур ттуршукулул ахирданий Ккав­кказнаву хьуну бивкIсса агьамсса иширттая махъ танмихIру кьувкьуну, цала Ватандалия жула аьрщарайн тIайла увккун ур 900-ннийн ивсса инсан. Зунттал халкьуннава чIявумигу Дагъусттаннайсса Гъази-Гъумучи тIисса лакрал шяравасса агьали бивкIун бур.
Жухь вай иширттаягу бувсунни жула муданасса букку ХIажи Ибрагьимовлул. Ванал ппухълуннал кьадаргу, бунт сававну, Псковуллал аьрщарацIун бавхIусса бур. АрулцIалку шиннардийва оьрус миллатраясса кулпатгу бувну, кIия арснал ва ца душнил ва минная бивзсса наслулул ппугу, хъунмя­ммагу хьуну, цувагу ялапар хъанай ур жула Псковщиналий.

ХIажинал жухь бувсмунива

«1877 шинал Гъази-Гъумучи тIисса ттул буттал шяраву хьуну дур оьрус паччахIнал чул бивщуминнайн, миски-гъарив къума-цIан буллалиминнайн къаршисса бунт. Ми иширттавух гьурттуну ивкIун ур ттул буттал буттал буттал ппугу. Къаккавк къаливчIун бур вайннан гъурбатрай», — буслай ур ХIажи.
Ванан оьрчIнийва ужагърай ттатта-бавахъая баяйсса бивкIун бур, Гъази-Гъумуксса къалалив­сса оьрус, маз-кьаз бихьлай, ярагъ щяв бишин бувну бивкIссар, миннава ярагъ щяв бишин рязи къавхьусса так ца хIаписар кьакьалувун увтун ивкIссар тIий.

Амма тарихралми чагъардаву кIицI бувну бур, лакрал бунтчитурал, оьруснал къалагу хъямала бувну, паччахIнал хIаписар Шяпи ХIажиевгу, Гъази-Гъумучиял ок­руг­рал хъунама полковник Чембергу, къалалийсса миннал кулпатругу ливтIуну бивкIссар тIий. Сагъну ливчIун бивкIун бур так полковникнал кулпат ва миннал 18 шин хьусса душ. Вайгу ширишилун бувгьуну бивкIун бур».
Телефондалувухсса ттущалмур ихтилатраву ХIажинал кIицI бувунни, цув къяразишиву тарихрал чагъардай чивчусса вай цаппара кIанттурдай.
«ХIасил, бунт лещан дурну махъ паччахIнал хIукуматрал щийкIуй рахIму бувну бакъар, — буслай ур ХIажи. — ЧIявуми кулпатирттащал ссивирлив гьан бувну бур – цавай Новгородуллал областьрай­сса Медведь тIисса шяравун, цавайгу – Псковуллал Опочкалийн. Ва бивкIун бур, га заманалух бурувгун, ккупIастурал, хъинну иш бавчусса, маэшатрал къаоьккисса, сайки 5 азараксса инсан яхъана­хъисса шагьру. Амма 1878 шинал, кIинтнил чIумал, шагьрулий 900 инсан ххишала хьуну ур.

Ссивир бувсса зунттал халкьуннан хIадур бувну бивкIун бур яхъанансса казармарду. Ми­ннансса дуки-хIачIия, лаххи-ликкиягу хIукуматрал диркIун дур. ХьхьичIсса 2,5 шинал дянив цIаллил ва цаймигу личIи-личIисса азардал 900 инсаннава 350 ивкIуну ур.
Ватандалийн зана хьунсса ихтияр вайннахьхьун дуллуну дур так 1883 шинал, Александр III паччахIну ацIаврицIун бавхIусса амнистиялийн бувну.
Бачин шайми зана хьуну бур махъунмай, зунттавунмай.
Шиккува кIицI бан, лакрал литературалуву агьамсса кIантту бувгьусса чичу ва революционер Саэд ХIабиевгу увссар 1882 шинал Опочкалий.
Ссивир бувсса цаппарассаннал кьадардугу хъуннасса захIматшиву, дахшишру дакъасса хьуну бур. Мисалдаран, дагъусттаннал ца сайт­рай цала ниттилмур чулухатусса буттал буттал буттая ца ур укун­сса затру чичлай:
«МахIаммад тIайла увккун ив­кIун ур Псковуллал губерниялий­сса Опочка тIисса шагьрулийн. ЧIава жагьилнан багьну бур Михаил Николаевич тIисса ца хъинну авадансса ва дакIнил имин­сса адаминал къатлуву зун. КарчI дакъасса ва тIайлашиву ччи­сса МахIаммад ганан най уна ххира хьуну, цала къулагъасрайн лавсун ур. Му чIумал га кIулгу хьуну ур цIанихсса революционер Саэд ХIабиевлул ппу Ибрагьиннущал (му Саэдлул ппу хьун увасса чIун диркIун дур). Ссивирлив бунугу, гьарцагу зий-захIмат буллалиминнан багьайсса арцул хIакь булай­сса бивкIун бур. МахIаммадлулгу аваданчуначIа мадара ххуйсса арцу ляркъуну дур.
Амнистия баян бувну махъгу МахIаммадлул пикри бувну бур цаппара хIаллай ялагу тиккува ацIан».

МечIал ххунчIахсса эшкьилул бурувччуну бур

Бахтти хьуну бур мукунма жул букку ХIажи Ибрагьимовлул бу­ттал буттахъангу.
«Цукуннив ца ишираву Опочкаллал ялувманан кIул хьуну бур ттул буттал буттал буттал ниттил нахIура-нахIуну жула миллатрал дукра-къяс дувайшиву. Ганилгу бувну бивкIун бур, хIакьинугу ттул ужагърай ца яла нахIумур дукралун ккаллийсса, мечIал ххункIру. Ттул кулпат оьрус миллатраясса бунугу, жул лакрал кунма, ккирттугу бувну, мечIал ххункIру бувайссар.
Учин мукъун, шагьрулул бакIчи хIайран увну ивкIун ур ттул буттал буттал буттал ниттил жула миллат­рал зумуну тих дуллай диркIсса дук­ралул. Му ишгу савав хьуну бур жул ппухълу тиха сагъ-саламатну зана шаврин. Цанчирча паччахIнал амнистия баян барчагу, аьрава, чу бакъа, ванийн-танийн лахълай, махъунмай зунттавунмай зана хьун бигьану къабивкIун тIий щинкIуй. Мунил дурсса дукралул усттаршиврухсса барчаллагьран Опочкаллал бакIчинал къулбас дусса чагъар буллуну бур гьарца дучрал станциялий вайннал аьраварттацIун бавхIусса чу баххана буллансса. Муна мукун, ттул буттал буттал ппуг­у каравну, ми зана хьуну бур Лаккуйнмай».
Ва ишираягу ванахь бувсун бур уссурссуннал, ХIажи, кулпатгу бувну, Псковуллай ялапар хъанай уна, МахIачкъалалив хъамалу увкIсса ппурттуву.

Шиккува ХIажи кIул хьуну ур бусалдаравун агьсса Семен Степанович Гейченкощал ва Гъази-Гъумучату мархри нанисса мунал кулпат Любовь (Рукьижат) Жалаловна Сулаймановащалгу»
Гихунай ХIажи буслай ур журналисткахь му кулпатрайн цува бакIрайн агьсса куц ва Рукьижатлул ппухълуннал бакIрачIан бувкIмур.
Ахирданийгу журналистка чичлай бур, цув вай иширттал хIакъираву Опочкаллал краеведениялул музейрал зузалтрачIан вай халкьунная лирчIсса материал дурив тIисса суалданущал гъан хьу­ссияв тIий. ХIайп, минная цичIав жула музейран ливчIсса бакъар, дакъар мукунна миннал суратругу, минная чивчумургу. Аьш-бакI дакъар мукунна вай буччайсса танисса бусурман хIатталлилгу.

Хъиривра мува кказитрай дурксса Анна Овсянникова «Къуттакьяправусса аьжаивсса ххуллулсса» тIисса цила макьалалуву буслай бур укун:
«Га публикация дурккун махъ жучIан оьвкунни Псковуллал областьрал ПаччахIлугърал архиврал директор Валерий Кузьминнул. Ганал бугу-бувсунни жухь областьрал архивраву таний Псковуллал аьрщарайн тIайла бувккун бивкIсса ккавкказуллал халкьуннал мина-гьанулия чивчусса хIат-хIисав да­къасса чагъарду яхьуну бушивугу. Бусанну жугу зухь цаппара. Мисалдаран, ганиннин гукунсса халкь цала аьрщарай, шагьрулий ххал къавхьуну бивкIсса ца ур чичлай:
«1878 шин, февральданул 2-сса кьини. Ахттая махъ ссят 4 хьусса чIун. Дучрал ва пучрал станциялучIансса ххуллул тиягу-шиягу мухлукь халкьуннал бавтIун бур. Гай ялугьлагьиссар тIар Ккав­кказуллая ссивир бувну тIайла бувксса 270 кулпатрах. КьурукIи дунугу, гьавалулгу, тIабиаьтралгу караматшиву. Цаппара хIаллава архний хIисав хъанан диркIунни аьжаив­сса янна-уссувусса халкьуннащал­сса аьравалтту. ЧIарав гъан хъа­на­хъиссаксса, ххуйну чIалан диркIунни гайннай лархмур – лахъисса кахригу дусса, ччанналун бияннинсса баркьутру ва къу­ттакьяпри.

Гайннавух бур бугьарассагу, жагьилссагу, бур хъами ва оьрчIругу. Щала ххуллийх аьравалттай бувкIсса гайннайх мар­ххалттанул къат даркьуну дия».
Зунттал халкьуннахьхьун бу­л­луну бур казармартту. Шагьрулул къуллугъчитурал цащава шай­сса кумаг бувну бур гайннан. Амма ххуллийхва бявкъу-гъили хьусса гайннава цаппара цIаллил къашавай лявкъуну бур. Опочкаллал азарханалий увагу 30 къашайшала кьамул ансса къулайшиннарду диркIнугу, бучIайхтува, цIаллил къашавайсса 82 зунтталчу кьамул увну ур. Хъуннасса нигьачIишиву дагьну дур азар щала шагьрулийх ппив къахьун. Мугьлат бакъа хIукму бувну бур азархана гьарта-гьарза бан ва зунттава бувкIсса къашайшалтрал дуки-хIачIия къулай дуван. Ва давривух укунмасса шагьрулул халкьгу хIала бувххун бур. Гьарма, цанма чирилун куна, гайннан бан шайсса кумагращал чIарав авцIуну ур.

Хъиннува захIматми къашайшалт цала аякьалийн лавсун бур шагьрулул иш бавчусса кулпатир­ттавасса хъаннил комитетрал.
ЧIунгу най, ссивир бувминнал багьу-бизугу, оьрмурдугу бигьа хъанан бивкIун бур. ЦIуцIаврил бувгьумигу хъин хьуну, ми бавцIусса кIанттурдай дезинфекциярттугу дурну, цукуннугу гъинтнийн був­ккун бур. Хъунмасса кумаг ва ишираву хьуну бур халкь, казармарттава бувцуну, гъинтнил лагерьдайн яхъанан бакьайхту. 70 палатка буллуну бур вайннахьхьун му чIумал хIукуматрал.
1878 шинал ноябрь зуруй Глушанин тIисса опочкаллал уездрал вакилнал Псковуллал губернаторнахь бувсун бур зунттал халкьуннал кулпатирттаясса 11 оьрчIан буккин-чичин лахьхьин буллай бушиву. Цала рапортрай мунал мукунма бувсун бур сентябрьданийва шагьрулий 3 «ккавкказуллал» дуссукъатта тIивтIушиву.

«ХIакьинусса кьини шанмагу дуссукъатлуву зий уссар 9 арцул, 8 дувссилул ва 6 уссал усттартал. Ва мяълумсса сияхI дакъар, цанчирча зунтталчутураву аьмну 55 инсан ур вай касмурдаха зун кIулсса. Даврил лагрулух бурувгун, дуссу­къатраву усттартал гьарза­сса чIунгу шай. Миву мукунма зий б­уссар кIанттул халкьгу», — чичлай ур уездрал вакил.
Зунттал халкьуннал ва шагьрулий шанна шин дурну дур. Гикку­сса халкьуннал ци хIарачат, ци кумаг барчагу, миннава чIявуми азардал ва зунттал билаятрахсса мякьлил яла лавгун бур. Опочкалийн гьан бувминнал сияхIрай 1878 шинал 16-мур февральданий ивкIхьурча 830 инсан, ссивирданул ахирданийннин, 1882 шинал январьданул 1-ннин миннава ливчIун ур увагу 332 инсан.

«Ккавкказуллал халкьуннан­сса хIатталу дансса кIану кка­ккан бувну буссия Новоржевская слабода тIисса кIанай, жугьутIнал хIатталлил чIарав. Баяйва зунттал халкьуннан Ватандалийн гьансса ихтияр дулунтIиссар тIий. Халкь ватандалийн зана хьун битира тIисса тавакъюращалсса лабизаву дурну дур Ккавкказуллал наместникнал кулпат, кIинияз-хъамитайпа Дундукова-Корсаковал», — чичлай ур га чIумалсса ца.

Залму АьбдурахIманова