[dropcap]И[/dropcap]юльданул 28-нний цIуну байбивхьусса Аьрасатнал футболданул цалчинмур турданул лагрулий МахIачкъалаллал «Анжи» команда футболданул майданнив хьунадаркьунни Екатеринбурграл «Урал» командалущал.
Руслан Къардашов
Футболданул сезон дайдишиннин «Анжи» командалун баххана бан багьунни хъунама тренер ва агьамми футболистурал кьюкьлул хъунмур бутIа.
Цалчинмур таймрай «Анжи» командалул хьхьичIунмур мурадну чIалай бия цала къапу буруччаву. Шиккува хIисаврайн ласун аьркинни «Анжилул» футболистурал дянивсса тIуркIулул дахIаву уттигу цIакь хьуну дакъашиву.
КIилчинмур таймрай «Анжилул» тIуркIулул чIалачIин даххана хьунни. Жула футболистал луглан бивкIунни «Урал» командалул къапулувун ттуп бакьинсса чараннах. ТIуркIулул 83-мур минутIрай «Анжилухьхьун» диривунни ттуп бакьинсса каши. Антоннул штрафнойлул дазул кьатIату урчIамур ччаннах бивщусса ттуплил хьхьичI авцIунни муттаэтурал защитник, байщусса ттуп цачIанма кIилчингу багьайхту, утти киямур ччаннах ххяххан бувну гьан бувсса ттуп къапулул мурцIнийн тIайла бавцIунни. Гол – 0:1. ТIуркIулул ахир хьуннин «Урал» командалул «Анжилул» къапулийн гьужум буллай дия. Къапу ябан хьусса «Анжи» командалул ларсунни ххувшаву ва бивхьунни цала «ххуржинттаву» цалчинсса 3 очко.
«Урал» — «Анжи» — 0:1 (0:0).
Урал: Годзюр, Динга, Балажиц, Бикфалви, Ильин, Кулаков, Димитров, Меркулов (Юсупов, 87), Егорычев (Евсеев, 63), Эль Кабир, Емельянов.
«Анжи»: Дюпин, Гиголаев, Удалый, Белоруков, Чансельор, Тетрашвили, Кулик, Рабиу, Чайковский (Антон, 68), Ахъядов (Маркелов, 56), Моххаммад (Агаларов, 80).
ХьхьичIмур футболданул сезондалий «Анжилул» Аьрасатнал футболданул чемпионатрай бувгьуссия 14-мур кIантту. «Анжилул» ва «Енисей» командарттал дянивсса бяст-ччаллал ккаккан бан аьркинссия цумур команда хъиривмур сезондалий тIуркIу тIунтIиссарив премьер-лигалуву. «Анжи» дух хьунссия. Амма, жула командалул талихIран, «Амкар» командалул чемпионатрай гьуртту хьуминнава цалла цIа лиххан дурукун, мунил кIантту бувгьунни «Анжилул».
Баххана бувунни хъунама тренер, генерал директор. Бувцунни цIусса футболистал: Константин Савичев, Владислав Кулик, Гаэль Ондуа, Андрес Понсе, Иван Новосельцев, Алти Ахъядов, Амир Мохаммад, Роланд Гитолаев, Мохаммед Рабиу, Дмитрий Белоруков, Юрий Дюпин.
Генерал директор Олег Флегоктовлул буслай ур «Анжилул» бурж бушиву 250 млн. къ., апрельдания шинмай футболистуран харж буллай бакъашиву, харжругу кьукьин бувшиву. Дагъусттан Республикалул ПаччахIлугърайн, кумаг бувара тIий, гьан бувсса чагъаруннин дуркIун дур инкар буллалисса жаваб.
Ччясса мутталий командалул бюджет щаллу бансса арцу къалякъирчан, «Анжигу» бюхъайссар «Амкарданул» ххуллийх гьан.
«Анжилул» хъиривмур тIуркIу хьунтIий бур августрал 6-нний Уфалий «Уфа» командалущал.
