Чув дур вил иман?

Поэма

[dropcap]В[/dropcap]а хъун бакъасса поэма чичин на хъит учин унна ттула буттал миналул бакIрачIан букIлакIимунилгу, хIакьину буттал аьрщарай яхъанахъиминнал дянив хIасул хьусса багьу-бизулулгу, нава тIутIимунил мяъна-мурад цаппарассаннан къабувчIлай, къакьамулну бушиврулгу, ниттил мазрайн ликлакимунилгу.

Ттула цIуцIисса дакIнил вай асарду хас буллайгу ура Ялув-ЧIатIлухъиял Аьшуран, Ачилгюллун ва Караматлун. Гьарца шяравун увкIтари, вай шанмагу хъамитайпалул ттухь учай: «Жун вил чичрурдай дакI дакьайча, ччя-ччяни чилуча», — куну.


Ссамад Дамаданов

1.

КкурчIа-чIирах щяивкIсса
Ца пайханмарнал куна:
«Ттун ххирасса щар-жямат,
Цархьхьу ттун макI ккарккунни:

БакIрал ххуйсса ца душнил
КIунттихь тIутIал кацI бия,
Нарза ласай найрдугу
Лагмава лехлай бия».

Микку, ивзун, ца къужлул:
«Асттавпируллагь, таллагь,
ЛямпIуртурал мажлисрал
Щар лиянтIиссар», — куна.

Ялагу куна къужлул,
Аьжаивну хъит куну:
«Бачияра, ивихтал,
Ттул хъирив тти сивсуну.

ЧIалай дурив эяллу,
Ил-аьламрайн оьвтIисса,
Та вилаххав аьравххун
ЧIивитIугу аьтIисса,

ЧIалай дурив чичрурду
ХхялчIи-чарттай авурсса,
Ва ялагу тахчарду,
Чирахъру бакъа ливчIсса.

ЧIалай бурив чIаххуврал
Къатригу кIихъякусса:
Гьунттий-сарану бувккун,
Тайгу вайлул хьунтIиссар.

ЧIалай бурив, муслимтал,
БакIщаращи чяр-чяр тIий,
Таних мякьнува буссар
Га щюлли хьхьиригума.

ЧIалай бурив азгъунну
Гьаннил бурхIай Таксса Мурхь:
Таниллихха ябайсса
Ца хъатуксса жула мулк.

ЧIалай бурив душругу,
Варакъив хъачIунттайсса,
Тайгу вайлул хьуну махъ
Щилли ттун щин дулайсса?

Шинай хьукьай, да Шаэр
Ци учара инагу.
Ишла бувакьай вила
Магьирлугърал бияла…

«ТIайлара ина, Къужай,
Азарийла тIайлара,
Вил махъру ва ттул шеъри
БувчIайривав жяматран?

Гъурбатрайн ливхъминнанни
Мазгу хъамабитайсса,
Чарттал ва мусил улча
Яруннал хьхьичI бацIайсса:

ТIитIа тти, Хъун-Зунттуй,
тархъанну хъару,
Кьярш тIунцIа ми вила
хъархъаллу-ттаркIру,
Гьаз хьуссар хIакьину
(так шатри щяхссар)
Ялув ЧIатIлухъиял уздансса кюру.

Аьш-аьщува бувккун,
гъурбатрайн бизан –
Му бакъар я ххуллу, я дакIнил давран.
Шайссарив кьабитан, дакIницIа буцан
Мубараксса аврдал азгъун Гьаллаххан?

БикIувча гъуркIа тIий
къукъухьхьи мудан,
Дюкьувча дунийра дяъвилул симан,
Щаращал макьангу, ччаврил ламагу
Лаласун бюхъарчан – мурихха иман.

ТIитIакьай, Хъун-Зунттуй,
тархъанну хъару,
Кьярш тIунцIа ми вила
хъархъаллу-ттаркIру:
Гьаз хьуссар хIакьину,
лахъссар, тархъанссар
Ялув ЧIатIлухъиял уздансса улча.

2.

«БучIия Шяраваллил
Кьини му балай учин,
Вай инсантурал дакIру
Чанссарагу тирх учин», —

Куна щиллив. Гьаз хьуна
Хъунмасса аьлагъужа,
СсихI-чIитI дакъа ливчIуна
Микку Шаэр ва Къужа.

ХьхьичIунмайгу ливчуна
Къащилул вибувцIуми,
Цахъи махъунмай хьуна.
ДакIницIух дард дарцIуми.

Мукъул заллухъру хьуна
Маз къакIул мазкIурахъул –
Мудан къур бувнувасса
Так ссупралул ссурахъал.

Минналгу ялтту ххявххун,
ЦIитI ивкIуна Сомбреро,
Ссирссилттайхгу ках куну,
ТIисса хханссар: «Сам брею».

Хъархъаллу-ттаркIру, гъурбат,
Тархъаншиву ци тIиссар?
Я ттун ххирасса уммат,
ЧIиви оьрчIгума хъянссар!

Хъян ивкIуна ларайсса
КIулшиврул КIяла-Кьяпа:
«ДикIанссия хъархъаллу,
Циванникьай ттаркIругу?

УвкIуна ца кунцIуллул
Щинай дирссу Сиккагу:
«Духьурчан, ттун хIан ччива,
ДикIанссия ссиркагу!».

УвкIуна хъункIултIутIул
Зумуну Пиш-ПиштIала,
Ришлай дия кьанкьругу
Хъазамрая аьтрилул.

УвкIуна лахъа-хъунну
Лахъи-хъала Маз-Базар,
Мунал тIийкун, маз къуркъа
Чув ия цува Шаэр.

УвкIуна Хавар-Хангу,
Махъ учин кIулма хьуну,
Дуркумур ва хIарчIумур
Буз къахъанай, сситтулну…

УчIайва каши ххинал
Ка тIитIара тIий бакIчи,
Каши ххима лявкIуну:
ХьхьичI ацIайва къаралчи.

УвкIуна, урчIамур ка
Галай дуллай, «Гьалилай»,
Ив-ивнащал хIалимну
«Гала-концертру» тIитIлай.

Шикку Къужлуйн, Шаэрнайн
Тарап дургьусса Чангий –
«Му ци гъургъазар», — куну,
Лаивзуна, агь, ирглий:

«Устав бикIан аьркинссар
Ца чIири-хъунсса фондгу,
Ялар жунма аьркинсса
ДакI марцIсса бакIчиталгу.

Ялар жунна аьркинсса
Шяраваллил кьинирду,
Ца-цаних тIий, щаллу дан
Хъунисса давурттугу».

3.

КIяла-Кьяпул бувуна
Унгу-унгусса доклад,
Докладрай дакI дяркъуну
ЛивчIуна агьлу-авлад.

Докладраву бакъая
Къеп учин къалмул ккукку,
Яни дурсса, дантIисса
Хъинсса давурттал хIукъу.

Ай-юх, бивххуна ницгу,
Щарай бия кIункIурду.
Бюхъайва дикIан ницIгу
Цумур-ца тIахIунттуву.

Экьинай дия хIантту
Лагмара, щинну кунна,
Яру щяв экьилавгун,
ХIачIулт-мурчIултгу бия.

Айгьин-угьан къахъанай
КъавтIий ия ТIайла Ттархь,
Ттархь дарккумур хъинссар тIий
ХIухчугу ия мунахь.

Махъру, махъру, агь, махъру –
Зума-ккарччулу махъру,
Къахънува къахъинссияв,
Къакъаба тIисса лахъну.

КIункIу дуруна ттархьру,
ИтххяхханцIа чIурдугу,
Ххяхха букканцIа ххяххан
Бувуна балчаннугу.

Ай-гьарай, кIицI дуруна
Къуллугъчитурал цIарду,
Гьаттава бизанссия,
Баярчан, жула ппухълу.

Амма тинмай ливчIуна
ЗахIматрал лахIан бувми,
ЗуманицIва ливчIуна
Кказитрал вакилгума.

Вана укун най бия
Щарнил Кьинилул мажлис.
Щарнил дянивух тиннай
Хъун хъанай дия хъякру,

4.

Миччава, мажлисрая,
Бивзун, бавчуна авлий
БакIуйнвагу лахъансса
Бюхъу бакъулт, къучитал.

Ца бакIу бивтсса чIумал,
Тти бакIру хъин банну тIий,
Бувххуна ссаламращал
ЯттихIухчил мащилийн,

Цу ялун учIарчагу,
Хъун-чIиви личIи акъа,
Хъамал кьамул бувайсса
ХIухчил гай хъин бивтуна.

«Насияра тти, — куна, —
Хъуншагьрулул хъин вирттал,
Тана-та ратIух лавай,
Таваккулданий бурттий».

Бавчуна, ссихI-пагьгу тIий,
Нихъри никъурттайн щилай,
Ца макьараоьрватIул
Бущилий шару ласлай.

Лагма щюлли гъи дия
Аргъирай ва чагъирай,
Мурчалгу бишлай бия
КIюла синттал чагъана.

Так «авчитурал» мажал
Бунил бухлавгун бия,
Гайннай лагмасса мачIал
Хъяхъаву дуллай бия.

Дунил дяйкьусса дия
Гайннал ларсъсса ишанну,
МурчIи-чIавкIсса ккуллардал
КкутIарисса лишанну…

5.

Буккулт, тти жува чансса
Махъунмай зана хьунну,
Хъилий бакIрай бишайсса
Кьяпри дакIнийн бичинну.

ДакIнийн бичинну ппухълу,
Къирият дурурччусса,
Ссупралух щябивкIукун,
Ас-намусрал бувччусса.

Ссапар бахIин чIун хьувкун,
Мугьлат бакъа цачIусса,
Гьаллахханнал лахъазан
Лахъан хIучI къаувкусса.

ЧIатIлухъату Хъусрахьхьун
Духхайссия уттусри.
Хъусращату ЧIатIлухъун –
Диян дайссия хъусгу.

Зунттурду бур чIалъаьрду,
ЧIавахьултту бакъасса,
Агь, тивугу инсантал
Бурвав чIалакъачIисса?

Аврду тIурчан, агь, аврду —
Ссавнийх хха чичлачисса,
Бищурчагу, щурчагу,
Хъирттава нур нанисса.

Ялун нани ник тIурчан,
Ялу-ялун къудурсса,
Оьттул рангсса шаттирдайн
Шатригу ланцIа тIисса.

Зунтту – му ччантIу бакъар,
Ччамар лагма бувайсса,
Къурнил никъагу бакъар,
Къучинал чул бувансса.

Зунттурду – ми чурттурдур,
АллагьначIан нанисса,
Ми битангу къашайссар,
ДакIнил нур дакъахьурча…

6.

Бакъар дуссухун занай,
Шахьлай аьрччап, щайини,
Иттан чари ккаккайсса
Ниттихъал нагьлий ини.

БяливчIунни магьравун
Нанисса ххуллурдугу,
Ххяхха букканцIа хIухIу
ТIисса кIяла бидавгу.

Дуссияхха чIуннугу
Щала ккурчIа аькьбарсса,
Яла дяркъуми дакIру
Дассан дуван хIадурсса:

Къашайрив, да япалухъ,
Яхьун къушлий бусравну.
Хьуну дурив дакI чалухъ,
Лирхъун дурив адавгу?

Насу зунчал дасрулийн,
Ритта винна дараччив,
Яла тIювайн увкIукун,
Шюша хъахъисса ккарччив.

ЧIаравнал оь къахIачIлай,
ХIачIи щаращал щинну,
Чаннану чIалантIиссар
Заннал дуллусса шинну.

ЧIалантIиссар вилаххав
Щаращисса кIункIургу,
ЛахьхьинтIиссар куклуну
КIараллий бакI дишингу.

Куклуну чIалантIиссар
Гьарица лавсъсса шагу,
Шаттиралун дуруглай,
Пиш тIунтIиссар щарссагу.

Гьаз бува оьрму лахъну,
Оьмур ччанналун бувтун,
БуккантIиссар оьрчIругу
ЧIанкъатлул дянив къавтIун.

7.

Агь, вай чартту, вай кьунтту,
ОьрчIнийва дакIнил лавсъсса.
Шаттирал бакIрах къурду,
Ккуру ишин кIукIлусса.

ЛицIаву щаращалгу,
Щурщулий экьинайсса,
Пахъ дагьаву мащалгу
Суннал яхъай пахъ дагьсса.

Тайнна гадран ххирасса
Хъахъи тIутIал бизантту,
Шаттиралу лахIлайсса
ШанчIапIал шан-ххуллурду.

Тана Ханнал-ВацIагу –
ХIакьсса алжаннул мурцIу –
Цуппа буний кьакьувча,
Дуржагьирал кьа кунцIа.

Тана бавцIун Таксса Мурхь
Цимигу ттуршукулий,
БацIантIиссар уттигу
ЯхI чан хьуминнахлугу.

Тана бавцIун Хъун Зунтту –
ЗанначIан куна, лахъан.
Вана ттул ЧIатIлухъигу –
Кьисмат хьусса ттун ляхъан.

Къума-цIансса дунъяллий
Чаннасса Буттал улчай,
Уча, циван къачинна,
Чичру чаннасса балай!

Якьама хьуна Шаэр,
Къужлул чIарав щяивкIун…

МахIачкъала — Ялув-ЧIатIлухъи
2014-2016ш.ш.