Агьалинал мурадру

Вай гьантрай агьали кьамул бунни АьФ-лул ПаччахIлугърал Думалул депутат Аьвдулмажид МахIрамовлул.

Имара Саидова
Бархъаллал шяравасса Гьидаят Шаммадаева бувкIун бия Ахъушиял райондалул администрациялий къатта-къушлил шартIру къулай даврил ирглий бавцIуну тамансса шинну хьунугу дунура, уттигу яржа къабиллай бушиву бусан. Депутатнал му масъала щаллу баврил хIакъираву оьвкунни Ахъушиял райондалул администрациялул бакIчинайн ва ДР-лул ЗахIматрал ва социал хьхьичIунмайшиврул министерствалийн.

МахIачкъалалив ялапар хъанахъисса Оьмариев Аьвдулхаликьлул мурад бия укунсса. Мунал бусаврийн бувну, инсантурал цIуллу-сагъшиврун хъуннасса нигьачIаву душиврийн бувну, Европанал ва США-нал асбест хIаласса строительствалул материаллу цукунчIав ишла дуллай бакъасса бур. Оьмариевлул ПаччахIлугърал Думалул ЦIуллу-сагъшиву дуруччаврил комитетрал члентурахь тавакъю бунни му масъала, хъирив лавну, ххал бигьаву. МахIрамовлул махъ буллунни му масъалалул хъирив лаян.

ЦIуссалакрал райондалул 1-мур азарханалул хъунмур хIакин Булбул Исрапилова бувкIун бия цила каялувшиву дуллалисса идаралул даву захIматшиврухун дагьлай душиву бусан, фельдшертурал ва акушертурал пунктру, биялсса штатру, анавар кумаграл бригада бакъашиврийну. Ванил мукунма бувсуна, Республикалул ЦIуллу-сагъшиву дуруччаврил министерствалийн цимилгу бувккун бунагу, азарханалул тагьар къулай даврих личIисса ургъил къавхьушиву.

МахIрамовлул Республикалул цIуллу-сагъшиву дуруччаврил министрнащал гъалгъа бан бакIрайн лавсунни.
Мукунма ва кьини депутат­н­ачIан бувкIун бия КФХ-дал субсидиярттал, давурттал дузал баврил ва цаймигу масъаларттал хIакъиравусса агьали.
Депутатнал циняв агьалинащал ккавккунни маслихIатру ва цала кумагчитурайн тапшур бунни ми мурадру щаллу баврил ялув бацIан.