Август зурул 15-нний Дагъусттаннайн увкIунни Аьрасатнал обороналул министр, армиялул генерал, Аьрасатнал Виричу Сергей Шойгу. Аэропортрай ва хьунаавкьунни Дагъусттаннал БакIчинал буржру чIумуйну биттур буллалисса Владимир Васильевлул ва ХIукуматрал председатель Артем Здуновлул. Сергей Шойгул аьрххилул мурадгу бур Каспийскаллал флотрал инфраструктуралул объектру дуллалаврил тагьар ххал дигьаву.
П. Рамазанова
Гьашину апрель зурул 2-нний федерал министр Сергей Шойгул баян бувссия Аьшттарханная Каспийскалийн бизан буллалишиву флот. Му мурадрай, Каспийскалий зий булувкьуну бур, 2020 шиналнин бувну къуртал бантIий бур госпиталь, аьралуннансса казарма ва хIаписартурал кулпатирттансса къатри, мукунма аьрали ярагъуннил луртанну ядуллалисса кIантту.
Махъсса шанна шинал лажиндарай Каспийскаллал флот авадан хьуну бур 18 цIусса жамилул, флотрал дур авиациягу. Аьрали шагьрулул инфраструктура лайкьсса даражалий дузал дувансса хIарачатрай зий бур. Сергей Шойгул баян бунни Каспийскалий хьхьирил цIакьсса аьрали база бувантIишиву.
