Артем Здунов: «Ца арцул кашилийну къашайссар циняв мурадру бартбигьин»

Ххал бигьлай бия 2035 шинайннин бартбигьинсса масъалар­ттал ххуллу-хха: дугьай хъуруннал оьргъашиву ххуй даву, инвестортал кIункIу баву, паччахIлугърал ка-кумаг баву, чIиримур ва дянивмур ишбажаранчишиврухун гъира бизан баврил шартIру ва хIаллихшиннарду.

Сессиялий гьуртту хьуминнал хьхьичI махъ лахълай, Артем Здуновлул бувсунни гьаз буллалисса масъалалул агьамшиврия. Мунал мукунма кIицI бунни, чIявуми чулухаллу хIисавравун лавсун, Да­гъусттан хъанахъишиву шяраваллил хозяйствалул аралуву ца яла хьхьичIунмур субъектну, хаснува къюмайтIутIи ххяххан баврил, ахънилсри дугьаврил, ризкьи ябаврил бутIраву.

ДР-лул ХIукуматрал председательнал увкусса куццуй, статистикалул ккаккиярттайн бувну, агьали кIанттул ахъулссаннул ва ахънил­ссаннул щаллуну дузал буллай ба­къар. Му масъала щурущи бан аьркинну бур хьхьичIунсса технологияртту ишла даврийну.
«Так ца арцул кашилийну ба­къар му масъала дузал байссача, байссар тIайлану каялувшиву даврийнугур. Шяраваллил хозяйствалул давуртту нани дан аьркинссар транспортрал, промышленностьрал бутIращал цачIуну, ца мурадирай. Жунма биялну бакъар агрологистикалул центрду», — увкунни А. Здуновлул.

Премьер-министрнал бусаврийну, шяраваллил хозяйствалул аралуву ца агьаммурну хъанай бур бакIлахъия машай дуккан даврил масъала.
Мува мурадирал хIакъираву ихтилат бунни ДР-лул шяраваллил хозяйствалул ва бакIлахъиялул министр Аьбдулмуслим Аьбдулмуслимовлул. Мунал бусаврийну, 2017 шинал республикалий шяраваллил хозяйствалул бакIлахъия ларсун дур 1231 млрд. къурушрансса. Шяраваллил хозяйствалуву гьануцIакулсса дахханашивуртту дан багьну бур.
Яла сессиялий гьуртту хьуми группарттайх бавчIуну, масъалар­тту ххал бигьлай бия гьарца темалул хIакъираву личIи-личIину.