Мюхчаншиврул мухIлу-хIин

2018-ку шин баян бувну бур «Мюхчаншиврул культуралул» шин хIисаврай. Мунийн бувну Ккуллал райондалий уттигъанну хьунни инсантал балаллаяту цукун буруччин аьркинссарив бусласисса буклетру бачIлачIисса акция. Ва акциялуй каялувшиву дуллай ия Ккуллал райондалийсса ГО и ЧС-рал вакил Кьурбайтаев Мир. Ванан кумаг буллай ия волонтер КьурбанмахIаммадов Халид.


Кьурбайтаев Мир буслай ур:
— Вай буклетирттай чивчуну буссар къатта-къушлий, шагьрулий, тIабиаьтраву инсаннан цукун къуццу тIун аьркинссарив цанмагу, цайминнангу зарал къахьунсса кьяйдалий. Такну шиккува, буклетирттаву, бу­ссар мюрщисса оьрчIру цукун буру­ччин аьркинссарив нитти-буттал, бала-апатIру къахьун. Хъиннува мугъаятну бикIан багьлагьиссар нину-ппу мюрщисса оьрчIахьхьун кирпитI къадириян, — тIий.