Ниттил маз язи бугьансса ихтияр нитти-буттахъахьри

[dropcap]И[/dropcap]юньдалул 26-нний Дагъусттаннал паччахIлугърал университетраву ДР-лул Жяматийсса палаталул, ДР-лул Халкьуннал Мажлисрал, ДР-лул Чичултрал союзрал, Тахо-Годил цIанийсса ДГИИП-рал вакилтал ва ДГУ-рал ва ДГПУ-рал декантал, преподавательтал, республикалул школардаясса директортал ва ни­ттил мазрал учительтал гьурттусса хъуннасса батIаву хьунни. Ши­кку ххал бигьлай бия махъ ппурттуву хъунмасса аваза бувтсса, республикалул школарттай ниттил мазрал дарсру ххи-чан даврил хIакъиравусса масъала.


З. АьбдурахIманова
БатIаву тIитIлай, ДР-лул кIул­шивуртту дулаврил министр Уммупазил Оьмаровал увкунни:
— Ниттил мазрайн багьайсса ихтилатру буниялагу къабигьа­сса, ялу-ялун жува аьраттал буккан буллалисса бур. Хаснува вай ихтилатру ца «цIуцIи кIанттун» ккалли бансса бур жулламур республикалий. Жува гьарнал шаймургу, къашаймургу бан аьркинссар, ниттил мазру буруччаврил хIакъиравусса ца бази лявкъуну, му федерал даражалийн буцин. Жула къювулия баян бан аьркинссар билаятрал хасъсса къуллугъирттайн, — увкунни вице-премьернал.

Махъру мукунма лавхъунни ДР-лул Жяматийсса Палаталул председатель АьбдулхIалим Мачаевлул, РАН ДНЦ-лул Мазрал, литературалул ва магьирлугърал институтрал хъунама Абусупиян Акамовлул, ДГУ-лул филологиялул факультет­рал декан Шабан Мазанаевлул, ДР-лул Халкьуннал МажлисрачIасса Комитетрал хъунаманал хъиривчу ХIамидуллагь МахIаммадовлул ва МахIачкъалаллал 11-мур школалул директор Зугьра Дибировал.

Вайннал цала ихтилатирттаву кIицI бувунни ниттил мазру ла­хьхьаврил хIакъиравусса федерал закондалуву кьамул дурсса дахханашивурттал агьамшиврия ва ми дарсру дишаврил хIакъиравусса методика къулай дан аьркинну бушиврия.
— Ххишала акъа ххари хьура ва суалдануву компромисс лякъаврия. Ниттил мазрал дарсру чара бакъа дихьлантIиссар школар­ттай. Утти, закондалийн бувну, нитти-буттахъахьхьун ихтияр дуллалиссар цала оьрчIал лав­хьхьуну ччисса мазрал дарс миннал цала язи дугьан, — кIицI бувунни ХI. МахIаммадовлул.

Законопроектрайн бувну, ­оьрус мазгу, паччахIлугърал агьаммур мазну бакъасса, утти ниттил мазрал сияхIравунгу лавсъссар. ОьрчIал нитти-буттахьхьун дуллуссар ихтияр цала оьрчIал школалий лахьлансса мазрал дарс язи дугьан.
БатIаврий хъуннасса къула­гъасрайн мукунма лавсунни Да­гъусттаннал миллатирттал мазурдин хасъсса методикалул литература, оьрчIансса луттирду биял къахъанахъаврил масъалагу. Республикалул школарттал библиотекарттаву биялну бакъар программалий оьрчIан ккалан кка­ккан бувсса луттирду. Биялну ба­къар мукунма ниттил мазрал учительталгу.
Шикку кIицI бувунни АьФ-лул паччахIлугърал ва ниттил мазру багьайсса даражалий лахьланшиврул чара бакъа сакин дан багьлагьишиву хасъсса фонд.

Дагъусттаннай, ва батIаврил вакилтурал кьамул бувсса хIук­мулийн бувну, сакин дуван­тIиссар Ниттил мазрал учительтурал ассоциация. Мунил вив яла сакин бувантIиссар гьарца миллатрал мазрал цанма-цанмасса секцияртту: яруссаннал, даргиял, лакрал, къумукьнал, агуллал, нугъайнал ва цайминнал.
БатIаврий мукунма гьаз бувунни, ниттил мазрал дарсирдал сий гьаз дансса мурадрай, республикалул районнай гъинтнил лагерьду ва «воскресный» школартту тIитIаврин хасъсса ихтилатругу.