АлхIаткьини, июль зурул 1-нний, Ккурккуллал шяраву хьунни «МарцI-уздансса улча» акциялул хIасиллу дуллалисса мажлис. КIира нюжмардий шяраваллил жямат ччалли бувккун, цанма-цанма ккаккан бувсса кIанттурдай марцIшиву дуллай буссия.
Андриана Аьбдуллаева
[dropcap]И[/dropcap]юнь зурул 30-нний, шяраваллил агьулданул инсантурая сакин бувсса жяматийсса советрал, цинярдагу участокру ххал дурну, гьарица командалул дурсса даврин кьимат бивщунни. ЛичIи дунни яла хьхьичIун дуркмур команда ва мунин арцуйнусса бахшиш дунни. Акция наниссаксса хIаллай жяматрал марцI бунни шяраваллил ккурчIа, кIичIиртту, мукунна, кьавкьсса мурхьру ххуку бувну, гьаттардил лагмасса чапарду дукьан дурну, щалагу хIатталлил лагма цIусса чапар дирхьуну, ххишала дакъа хъуннасса даву дунни.
[dropcap]В[/dropcap]а кьини экологиялул эстафета шадлугърал даражалий ккурккуллал дуллунни гъумучияхьхьун. Мажлисрай гьуртту хьунни Лакрал райондалул администрациялул бакIчи Юсуп МахIаммадов. Цала ихтилатраву ванал барчаллагь увкунни экологиялул акция ларайсса даражалий тIайла дурксса Ккурккуллал жяматрахь, ва даврил чIарав авцIусса ва райондалун ччюрк экьидичлансса «Камаз» бахшиш бувсса СалихI ХIажиевлухь. Жяматрал хьхьичI Юсуп МахIаммадовлул баян бунни СалихI ХIажиев уттиния тихунай Лакрал райондалул хIурматлувсса гражданин хъанахъишиву. Ихтилат къуртал хьуну махъ райондалул бакIчинал дуллунни Грамотартту ва Барчаллагьрал чагъарду акциялуву чялишсса гьурттушинна дурминнан.
ТIабиаьтрал луртаннал ва экологиялул министрнал хъиривчу Арслан МахIаммадзапировичлул буллунни Барчаллагьрал чагъар СалихI ХIажиевлун.
— Жула райондалия дайдирхьусса ва ххаллилсса акция хъиндайдихьуну хьуннав. Умуд бур, ванил барачат бивну, щалагу Дагъусттаннай марцIшиву хьунссар тIисса, марафон къуртал хьуну махъгу шяраву жяматрал марцIшиву дуручланссар тIисса. Бачияра гьарица инсан жуятува байивхьуну цайминнан эбрат ккаккан дулланнуча. Маэкьидичларду ччюрк бири-биривсса кIанттурдайн, ябувара марцIну жувагу, жула оьрчIругу заназисса кIанттурду. Укунни жущава жула оьрчIру марцIшиврийн ва низамрайн аьдат бан хьунтIисса. Му чIумал жула улчагу тIутIайх бичинтIиссар, — увкунни СалихI ХIажиевлул.
Хъирив «МарцIсса улча» акциялул лагрулий хьуну диркIсса оьрчIал суратру дишаврил конкурсрал хIасиллу дунни. ХьхьичIунсса кIанттурду бувгьуминнан дунни арцуйнусса бахшишру.
Ахирданий Ккурккуллал шяраваллил администрациялул бакIчинал дуллунни марцIшиврул лишанну хъанахъисса щинал дурцIусса бархъаллал кIартташи Гъумучиял администрациялул бакIчи МахIаммад ХIусниевлухьхьун. Хъирив ххаллилсса балайрду увкунни Арслан Шагьмардановлул ва АьлихIажи Шамхаловлул.