[dropcap]И[/dropcap]юльданул 6-нний МахIачкъалалив Республикалул кулпатран ва оьрчIан социал кумаг баврил центрданий хьунни ихIсаниятрал ххуллийсса концерт, цувгу хас дурсса щалагу Аьрасатнаву кIицI лагайсса Кулпатрал, ччаврил ва хаин къашаврил кьинилун. Му сакин дурну дия лавай кIицI лавгсса центрданул, Республикалул Халкьуннал творчествалул къатлущал цачIуну.

Бадрижамал Аьлиева
2008 шиная шиннай кIицI лаглагисса ва байрандалул православ мархри бухьурчагу, ва дур, я миллатрах, я диндалух къабурувгун, цинявппагу инсантурал байран, цанчирча нахIусса бавкьусса кулпат бусса инсан – му, ци диндалул, ци миллатрал унугу, яла талихI бума инсан уну тIий. НахIусса кулпат бакъасса инсаннан, ци карьералул, ци хъус-кьинилул заллу унугу, оьрмулул тIин-тIааьн, ххаришиву щаллуну къадурчIайну тIий.

[dropcap]В[/dropcap]а кьини Аьрасатнал шагьрурдай ва шяраваллаву дувай личIи-личIисса шадлугъру, Дагъусттаннайгу, личIи бакъа. Махъсса шиннардий ва кьини кIицI лаглагаву аьдат­равун дагьну дур Республикалул кулпатран ва оьрчIан социал кумаг баврил центрданийгу. Ва байрандалул дур ттюнгъасса лишангу – кIяла тIутIи (ромашка), шадлугъ дуллалисса залгу чIюлу бувну бия Центрданул оьрчIал цала карунних дурсса кIяла тIутIал, мукунма къукъухьхьирултрал. ЧIиртту чIюлу бувну бия кулпатран хасну дирхьусса суратирттал.

[dropcap]В[/dropcap]а кьини шиккун оьвчайссар 25-30 шинай цачIу оьрму бувтсса, лайкьну оьрчIру тарбия бувсса лас-щарнийн. Центрданул директор Майрам Расуловал, бавтIминнал хьхьичI ихтилат буллай, бувсуна ва байрандалун цIа куну дуккан дур­сса медаль душиву ва му цурдагу дулайшиву цачIу нахIуну-хIалалну 25-хъул шиннардий ялапар хъанахъисса кулпатирттан. Гьашину му медаль, ДР-лул захIматрал ва соцлябуккулул министр Расул Ибрагьимовлул тапшур баврийн бувну, дуллунни кIива кулпатран: архIал 45 шинай оьрму бувтсса, 3 оьрчIгу, 7 оьрчIал оьрчIгу бу­сса МахIаммад ва Светлана Сулаймановхъан; Михаил ва Людмила Смирновхъан. Медаллугу, грамотарттугу дуллунни ванил кIивагу кулпатран.

Байран чIюлу дурунни цIа дурксса балайчитурал Дилярал, СултIанат Атаевал, Зайнаб Абсаматовал, «Волна» хорданул солисткахъал, шагьрулул 5-мур искусствалул школалул чIава балайчитал Жамалия Темирхановал ва Лайли Аьлиевал, «Ссихьри» тIисса къавтIаврил группалул мюрщултрал.
Мажлис най бия нахIу-на­цIушивурттал ссупрардах.
Байрандалийн оьвкусса цинявппагу кулпатирттан дуллунни бахшишру.

[dropcap]В[/dropcap]а кьини медаль дуллусса МахIаммад ва Светлана Сулаймановхъул лак бушиву кIул шайхту, дакIний тIааьншивугу ххи хьуна. Вай бур ГьунчIукьатIрал шяравасса. МахIачкъалалив ялапар хъанахъисса МахIаммад ва ЦIуссалаккуй хъунма хьусса Светлана цаннан ца цалчин ккавккун бур 1973 шинал дайдихьулий. Му шинала, июль зуруй, хъатIигу бувну бур. Ва зуруй дурусну 45 шин хъанай дур вайннал цачIу оьрму бутлай. Вайннал дянив хьуну бур 3 душ – Кабират, Миясат, Карина, бур 7 душнил оьрчI. Душнил оьрчIаву хъунма-хъунмур бур Амина, мунил гьашину ххуйсса кьиматирттай къуртал бунни 9 класс, мунил хъиривма – МахIаммад-Аьли – цимилагу хьуну ур гьузузаврил бяст-ччаллай чемпион. Душнил оьрчIаву яла чIаваманан тIурча, бачIи барзвагу хьун бувар.

[dropcap]М[/dropcap]ахIаммад пенсиялийн укканнин зий ивкIун ур щупирну, Светлана цIанагу зий бур цилва ванияр чIярусса шиннардил хьхьичI язи бувгьусса бухгалтернал пишалий.
Махъа нанисса жагьилтуран, жагьилсса кулпатирттан ци мас­лихIат буван бюхъанссия тIисса ттул суалданухун Светлана укун тIий бур: «ХъачI-хъачIрай дирхьуну, архIал оьрму бутанну тIисса жагьилнал ва душнил хъунмур мурад ца бикIан аьркинссар – кулпат буруччаву. Му буруччиншивруллив – кувннан кув бувчIинмур буллан, кувннан кувннал чIиви-хъунсса гъалатIру хIалал битлан, цаннал гама цана ччийкун аххана уванмур къабуллай, га цукунсса урив, мукун кьамул уван, даймур цачIу, ца мурадирай дуллан».