Хъамитайпа – хъиншиврул лишанни

[dropcap]И[/dropcap]юнь зурул 24-нний МахIачкъалалив, Родопский бульварданий, хьунни «Хъамитайпа – хъиншиврул ва дакьаврил лишанни» тIисса цIанилу республикалул фестиваль.

П. Рамазанова
Кьини кIирисса духьувкун, миллатрал лаххиялуву байрандалийн бувкIсса хъаннин хьхьирицIсса дюхлулсса гьава дарманну бия. Байрандалийн чIявусса хъамал бавтIун бия, зунттал районная бувкIссагу бия. ЧIаххуврайсса регионная бувкIсса хъамалгу чан бакъая. Фестивальданул сиптачиталну бия Дагъусттаннал муфтиятрал просвещениялул отдел, Динийсса иширттал комитет ва Культуралул министерство.
Муфтинал цIанияту хъами барча буван фестивальданийн увкIун ия мунал хъиривчу АхIмад Кахаев.

Фестиваль кIюрххилла дайдирхьуна, гьанттайннин лахъигу ларгуна. Кьинил кьинибархан хьхьирил зумания баллай бия нашидру, тамаша буллай бия Дагъусттаннал агьалинал канил давурттай, исвагьисса лаххиярттай, ичIаллил кьай-кьуйлий, тIахIни-кIичIулий. Миллатирттал дукрардал мастер-классру бакъагу, бия цаймигу пагьмурду ккаккан буллалисса мастер-классругу. Бия ххалаххул давур­тталсса, бия инсаннан цалчинсса медициналул кумаг бувангума лахьхьин буллалисса. Мюнпат ласун ччинан мюнпатмур чIявуя.

Хаварбакъулий фестивальданийн бакIрайн багьсса туристал киносурат ххал дуллалисса кунмасса асарду бур тIий бия.
Байрандалий ттун бакIрайн багьуна лакку душругу. ЧIярусса шиннардий Лакрал театрдануву зий бивкIсса Анисат АьбдуллатIипова хIакьину просвещениялул отделданул ца яла чялишмур член бур. Бувсунни ванил циламур пикри фестивальданул хIакъираву:
— Гьарца райондалул цалла культура, лаххия, дукрарду ккаккан дунни, чIявусса миллатирттал душру лагма лавгунни. Цинявннал симанная нур дизлай дия, ца авурну, ххуйну чIалай бия чалагъайрттавусса ва цайми лачакирттавусса, бузмардавусса хъами. Муфтиятрал мурадвагу личIи-личIисса миллатирттал душру ца урцIух ккуркки лаган бувавуя, поэтессахъул, балайчитал, творчествалуха зузими ва кьини гъалгъа тIий бия ца мазрай – хъиншиврул мазрай.

На, муфтиятрал оьвча куну, Саният Рамазановайн, Луиза Шагьдиловайн ва Аьйшат Насруллаевайн оьвкуссия. Миннул чIурдал ва такьвардал ххуйшиврий хIайранну бия циняв…
Фестивальданул цал ттигу исватну ккаккан бунни Дагъусттаннал агьали, миллатру ва динну личIи къадуллай, бавкьуну ва нахIуну ялапар хъанай бушиву. Цал уттигу исватну ккавккунни дагъусттаннал этносрал аваданшивугу.
Фестиваль лайкьсса даражалий дузал даврил ххуллий биял­сса захIмат бивхьуну бия Муфтиятрал просвещениялул хъаннилмур бутIул хъунмур Аьйшат НурмахIаммадовал.