Хъунасса аьлимчунал аьпа абад баву жуйвасса буржри

Жун, Москавлив ялапар хъанахъисса да­гъус­ттанлувтуран, Жавраиллул арс Амаев Амирдул цIа Ма­хIачкъалаллал цания ца лайкьсса кIичIираваллин дизан аьркинни тIисса тавакъюращал буккан ччай бур хасъсса къуллугъирттайн.

Ларгсса шинал Дагъусттан Республикалул бакIчинал мяйжаннугу кьамул бувну буссия хъуншагьрулул цания ца кучалун жула хъунасса аьлимчунал цIа дизан. Амма хIакьинусса кьинигу му хIукму чагъарданийва ливчIсса тагьар дур.

[pullquote]Амир Амаевлул жула билаятрал кьудрат хьхьичIуннай даврин, ядерданул энергетикалул гьану бизаврин хас бувсса оьрмулун лайкьсса кьимат ттигу бивщуну чIалай ба­къар. [/pullquote]

[dropcap]А[/dropcap]мир Жавраилович дунияллий усса чIумал, мунал суратру лархъун дикIайссия Да­гъусттаннал цаппара хъун къуллугъчитурал кабинетирттаву. БувчIлачIиссаксса, аьлимчунал суратирттая миннан чансса бунугу хайр хъанай бухьунссия. А. Ж. Амаев Аьрасатналгу, Да­гъусттанналгу пахрулун лайкьсса арсри. Цинявгу дагъусттанлувтал хIала бувххун ва даву щаллу дансса хIарачат бан аьркинссар. Ва давривух чялишсса гьурттушинна данссар тIий буру, ца дагъусттаннал диаспоралул, жяматийсса сакиншиннардил, «Илчи» кказитрал дакъассагу, гьарцагу хIакьсса лаккучура тIисса чувнал.

Ттун бувчIлай бур МахIач­къалалив Амир Амаевлул цIа дизансса хъуни кучарду бакъашиву. Амма лавхьхьу-лайкьсса ванал цIа дизансса куча бакъашиврийнгу хъунмасса щакри.
Амир Амаевлул жула билаят­рал кьудрат хьхьичIуннай даврин, ядерданул энергетикалул гьану бизаврин хас бувсса оьрмулун лайкьсса кьимат ттигу бивщуну чIалай бакъар.
Жул, Москавлив ялапар хъанахъисса гьарцагу дагъусттан­лувнал, оьрмулул ххуллурду цимилгу тIайла бавцIуссар Амир Жавраиловичлуйн, оьрмулул чIяруми шинну мунацIун дархIуну диркIссар. Мунияту ва иш дузрайн буккан баву жунгу жуйвасса буржну чIалай бур. Хъунмасса умудгу бишин ччай бур, гьашину МахIачкъалалив аьлимчунал цIа абад дансса чIири-хъунсса шадлугъ хьунхьуви тIисса.

Арсен ХIусайнов, Москавливсса «Дагъусттан» культуралул центрданул  президент