Къуллугъчитал бугьлай бур

Июль зурул 6-нний МахIачкъалаллал Советский райондалул судрал кIива зуруйсса дуснакь увну ур Дагъусттаннал ХIукуматрал председательнал цалчинма хъиривчуну ивкIсса Рамазан Аьлиев.
Рамазан Аьлиев увгьуну ур ФСБ-лул зузалтрал, ванал кабинетраву ва шаппа цIухла бивхьуну махъ. Р. Аьлиев ивтун ивкIссар ва къуллугърай гьашинусса шинал февраль зурул 22-нний.

***
Ххуллункьини, июль зурул 7-нний, ФСБ-лул зузалтрал увгьуну ур Да­гъусттаннал ЦIуллу-сагъшиву дуруччаврил министрнал къуллугърай ивкIсса Танка Ибрагьимов. Ванал ларай­сса технологиялул медициналул кьай-кьуй ласун итадаркьусса арцу цалалуш дуллай ивкIшиврийн щак тIий бур.
Апрель зурул байбихьулий Танка Ибрагьимовлул кьабивтун бивкIссар цIуллу-сагъшиву дуруччаврил министрнал къуллугъ. МахIачкъалаллал Кировский райондалул судрал хIукму бувну бур тахсир ккакканнин Т. Ибрагьимов 10 гьантлийсса шава щяитан. Ванияр махъ силистталул цаймигу тахсиркаршивуртту ашкара дурну, Т. Ибрагьимов цIунилгу дуснакь увну ур. Ибрагьимов министр­нал къуллугърай ивкIссар 2013 шинал, февраль зуруя айивхьуну.