Ххув къавхьухьурчагу, бухгу къавхьуссару

Июльданул 15-нний Дунияллул футболданул чемпионатрал финалданий данди дуккан най дур Франциянал ва Хорватиянал цачIундур командартту.

Р. Къардашов
Финалданийн дияннин Хорватнал цачIундур команда ххув хьунни финалданул мукьлицарттуй Аьрасатнал командалуяр, полуфиналданий – Англиянал командалуяр.
Аьрасатнал ва Хорватнал командарттал дянивсса тIуркIулул счет хьуна: агьаммур чIумуй – 1:1, ялун ххи дурмур чIумуй – 2:2, пенальти бивщуну махъ – 3:4.
Бух хьурчангу, Аьрасатнал командалул чемпионатрай ккаккан бунни цукун шайссарив, жандалий хIайп къакуну, цIакьсса низамрай, муттаэтурал гьарцагу командалун цинма хасъсса тактикалул гьанулий футболданий буккан.
Черчесовлул командалун чIи­висса ша ласун ливчIуна чемпионатрал полуфиналданийн ла­хъаншиврул. Хъиривмур чемпионатрай ва шачIанттуйнгу ла­хъансса умуд бур тренернан.
Чемпионат дайдишиннин жула футболистътурай аьй-бювкьурду дуллай бивкIхьурчангу, Аьрасатнал паччахIлугърал тарихраву футболданул цачIундур команда цалчинни Дунияллул футболданул чемпионатрай финалданул мукьлицарттуйн дирсса.

ХIисавртту
Дунияллул футболданул чемпионатрал 60 тIуркIу хьувкун (полуфиналлу дайдишиннин) ФИФА-лул дурунни цаппарасса хIисавртту.
Цала къапу голлая буруччаврил яла лахъмур даража ккаккан бувунни Аьрасатнал командалул – байщун бунни 259 гьужум. Бразилиянал цачIундур командалул цащала ччалли бувкминнал чулухунмай бунни 292 гьужум. Яла чIярусса футболистурал дянив­сса пасру дунни Испаннал командалул – 3120.
Чемпионатрай яла чIярусса лечаву дурну дур жула футболист Роман Зобниннул – 5 тIуркIулий ванал диртун дур 62 км.
Къапулувух яла чIявуну ттупру бивщума футболист ур Неймар (Бразилия) – 27. Пасру дулаврий яла мяш къавхьума ур Серхио Рамос (Испания) – 485. Гьарза-гьарзану цала команда голлая ххассал дурсса къапучи ур Гильмеро Очоа (Мексика) – 25.

Тамашачитура­щал­сса хьунабакьаву
Июльданул 9-нний Аьрасатнал футболданул цачIундур команда Москавливсса фан-зоналий хьунадаркьунни тамашачитуращал. 24 азара инсаннал хьхьичI махъ лавхъунни хъунама тренер Станислав Черчесовлул. Ванал барчаллагь увкунни командалул ялув дакI цIий бивкIсса тамашачитурахь: «Чемпионатрал цалчинмур секундрая байбивхьуну, дакIнил буслай бия зу жул чIарав бушиву. Зу ккалли бан бучIиссару командалул 12-ми, 13-ми, 14-ми, 15-ми, 16-ми гьурттучиталну», — тIий ия тренер.

Махъру лавхъунни Аьрасатнал командалул футболистуралгу: «Жу футболданул майданнив дакIнихтуну буклай буссияв жула билаятрахлу, хIарачат буллай бу­ссияв ккаккан бан Аьрасатгу душиву футболданул паччахIлугъ», — тIий бия футболистал.
Июльданул 14-нний Санкт-Петербурглив Дунияллул чемпионатрал чарвитул медальданухлу футболданул майданнив ччалли дуккантIиссар Бельгиянал ва Англиянал командартту. Июльданул 15-нний Москавлив хьунтIисса Франциянал ва Хорватнал командарттал дянивсса тIуркIулул кка­ккан антIиссар хъиривмур мукьрагу шинайсса Дунияллул футболданул чемпион.