Дагъусттаннал БакIчи Владимир Васильевлул оьвкуну Да­гъусттаннайн бувкIсса Аьрасатнал монополиялийн къарши­сса къуллугърал зузалтрал ашкара дурну дур цIуллу-сагъшиву дуруччаврил аралуву даруртту ва медициналул техника даххаврил ва машан ласаврил хIакъиравусса закондалуцIун къабавкьуну дур­сса икьраллу (картельный сговор).

---

А. Аьбдуллаева
Республикалул ФАС-рал управлениялул пресс-службалул бусласимунийн бувну, мукунсса икьраллу ашкара хьуну дур республикалул ЦIуллу-сагъшиву дуруччаврил министерствалул, «Медфармаснаб» «РегионФарма», «Дагмедтехника», «Глобалмедтех» ООО-дал давриву.

Миннул хIакъираву Аьрасатнал ФАС-рал сукку дурну дур мо­нополиялийн къаршисса дело. Ялун чIалачIисса куццуй, икьраллу дурминнал доходру 7 миллиардрайн лахълай дур.
Ва иширал хIакъираву ДР-лул МВД-лул Силистталул управлениялул сукку дурну дур уголов дело (ст. 178 УК РФ).
«Гьарца шинах паччахIлугърал чIяру дуллай дур ЦIуллу-сагъшиву дуруччаврин бюджетрава итадакьлакьисса арцу. 2015 шиная байбивхьуну, пациентътурал организациярттал кьиматирттайн бувну, къашайшалт дарурттал дузал баврил тагьар тIурча, яларай дагьну дур. Мура шиная байбивхьуну, цакуну чIяру хьуну дур цала ккаккан був­сса багьлий даруртту бахлахаврил хIакъиравусса икьраллу. Миннул «канай» дур хIукуматрал пациентътал дузал бан бюджетрава ххишалану итадакьлакьисса арцу.

Укунсса, медициналул техника ва даруртту машан ласаврил аралуву закондалуцIун къабавкьуну, дурсса икьраллан (картеллан) ххуллу кьукьаврия хъунмасса мюнпат хьунтIиссар республикалий ялапар хъанахъисса гьарцагу инсаннан, — тIий ур Аьрасатнал ФАС-рал хъунаманал хъиривчу Андрей Цариковский.