«Каялувчинахь ихтияр дакъассар игьалагай кьинигу игьалаглансса»

[dropcap]И[/dropcap]юльданул 2-нний МахIачкъалалив ДР-лул БакIчинал кIанайма Владимир Васильевлул каялувшиврий хьунни гьарца нюжмардий цал шайсса агьамми масъаларттал хIакъиравусса батIаву.

[dropcap]Б[/dropcap]акIрайва сукку бунни Хасавюртлив перинаталь центрданий оьрчIахсса щар­сса къуртал хьушиврул масъала. ДР-лул цIуллушиву дуруччаврил министр Жамалуттин ХIажиибрагьимовлул бувсунни хьхьичIмур кьинива Хасавюртлив тIайла увккун ивкIшиву министерствалул зузала, сакин бувну бушиву му иширал хъирив лаян аьркинсса комиссия.

Владимир Васильевлул исполнитель властьрал органнал каялувчитурайн тапшур бунни бигьалагай кьинирдайгу зун. «Каялувчинахь ихтияр дакъассар бигьалагай кьинирдайгу игьалаглансса. Жува инсантурал къуллугърай буссару, мунияту хьхьугу, кьинигу кIулну бикIан аьркинссар лагмава ци хъанай буссарив. Ччимур кьинигу жува аьркинссару биян къашайшалачIан, лещан дуван ссацIух дунугу ларчIсса цIу, лакьин экьинани­сса газ, дукьан дуван ххуллийн дагьсса лахIуни ва м.ц.», — увкунни В. Васильевлул.

Муния махъ ххал бивгьунни 2017-2018 шиннардий азарханарду ва поликлиникартту анаварсса интернетрал щаллу баврил масъала. Мунил хIакъираву ихтилат буллай, Жамалуттин ХIажиибрагьимовлул бувсунни гьашинусса шинал ахирданийнин интернетрал щаллу бантIий бушиву 412 медициналул идара, цIана муниха зий бушиву.
Владимир Васильевлул бусаврийну, азарханарду интернетрал щаллу буллалиссар, хIакинтураща, иш багьсса чIумал, бюхъаншиврул цайми регионнайсса даврил уртакьтуращал маслихIат ккаккан, мунийну лапва чан хьунтIиссар хIакиннал чулухасса гъалатIру.

БатIаврий ххал бивгьунни мукунма туризмалул иширттал масъаларттугу. ДР-лул ХIукуматрал председательнал 1-ма хъиривчу Анатолий Карибовлул бусаврийну, хIакьину республикалий зий бур 52 турист къуш (база), минний бур 12 азара инсан цалархIал яхьунсса кIанттурду, бур 25 санаторий, 131 патирхана, 38 хъамаллурансса къатта ва 51 турбаза.