Виваллил иширттал коллегиялий

ХIакьину МахIачкъалалив, хIучI къаувкуну, ччинийх сайр буллан, зун, занан хъанай бур

Июль зурул 23-нний хьунни Дагъусттаннал Виваллил иширттал министерствалул коллегиялул мажлис. Микку хIасиллу дунни республикалул ОВД-лул цалчинмур дачIи шинай дурсса даврил ва кIицI лавгунни кIилчинмур дачIи шинай бартбигьланмур.


Андриана Аьбдуллаева
Шикку гьуртту хьунни ДР-лул ХIукуматрал председательнал хъиривчу Рамазан ЖахIпаров, ихтиярду дуруччай структурардал вакилтал, шагьрурдал ва районнал МВД-лул отделлал каялувчитал.
Коллегиялул даву тIитIлай, Дагъусттаннал виваллил иширттал министр, полициялул гене­рал-лейтенант Аьвдурашид Ма­хIаммадовлул бувсунни цайми ихтиярду дуруччай органнащал цачIу Виваллил иширттал министерствалул хъуннасса даву дуршиву жяматийсса низам дуруччин ва тахсиркаршивурттан ххуллу кьукьин. Органнал чаранну лявкъуну, Дунияллул футболданул чемпионат ва Европанал лачIун буккаврил чемпионат ва мукунна цаймигу агьамсса мероприятияртту нанисса чIумал, бювхъушиву мюхчаншиву дузал дан, терроризмалиясса нигьачIаву чан хьун дан.

— ФСБ-лул подразделениярттащал ва цаймигу республикалул ихтиярду дуруччай структурардащал жуща бювхъунни къачагътурал ярагъ бухлаган бан ва терактру хьун къаритан. Амма къачагътал ттигу чялишну бур. Вай гьантрай оьрмулуцIа бунни ДПС-лул къуллугърай зузисса жул кIия зузала, — увкунни Аьвдурашид МахIаммадовлул.
Министрнал бусласимунийн бувну, криминал тагьар щачин дуллай дусса дур закондалуцIун къабавкьуну ярагъ ишакаш буллалаврилгу. Ххишаласса къулагъас дуллан багьлай бусса бур ярагъ буллалисса, травматический ва газрал ярагъ аьрали ярагърайн кIура баен буллалисса кьюлтIсса дуссукъатри ашкара баврих. Мукунма хъуннасса къулагъасрайн ласун багьлай бусса бур наркотикру закондалуцIун къабавкьуну ишакаш баврил, ччуччиялул ва токрал комплексрал, ххуллурдай мюхчаншиву дузал даврил масъалартту.

Ихтилат къуртал буллай, Аьвдурашид МахIаммадовлул кIицI лавгунни кIилчинмур дачIи шинай зунсса масъалартту: экстремизмалийн къарши бацIаву, жагьилтурал тIулда­къа­шивуртту къадансса чаран лякъаву, ххуллурдай мюхчаншиву дузал даву ва ДТП-ву захIматсса апатIру хьусса ишру чан хьун бансса чаранну лякъаву.
Республикалийсса тагьардания балжину бувсунни цала ихтилат­раву виваллил иширттал министр­нал хъиривчу, виваллил службалул полковник АхIмад Баталиевлул. Ванал бувсунни ряхва зурул дянив тахсиркаршивуртту 4,5%-рал ххишала хьушиву. КриминалдануцIун бавхIусса ишру чIявусса хьушиву Буйнакскалий, Избербашрай, Кьиблалул Сухокумскалий, Къизилюртуллал, Агъуллал, Ахъушиял, Гергебиллал, Лаващиял, ЦIуссалакрал, Нугъайнал, РутIуллал, Сергокъалаллал, ТIляратIиял ва Хъунзахъиял районнай.
Ванал бусласимунийн бувну, ашкара дурну дур 6278 тахсиркаршиву, кIул бувну бур тахсиркаршиву дурсса 4710 инсан. Чан хьуну бур ихтиярду дуруччай органнал зузалт оьрмурдацIа бан кьаст лархIусса, ивчIанна тIий инсан ивкIусса, инсаннан захIматсса цIунцIияртту ва гуж-къия дурсса, цIу щусса ишру, къачагъшивуртту, къавкъиншивуртту.
ДачIи шинал хIасиллайн бувну, ххуйсса ккаккияртту хьуну дур закондалуцIун къабавкьуну ярагъ ва пIякь учай затру ишакаш даврийн къарши бацIаврил давриву. Зевххуну бур 162 битай ярагъ.

Вара чIумул дянив шагьрурдай ва районнай зевххуну бур 128 битай ярагъ, миннувух – 14 автомат.
— ХIакьинусса кьинигу Виваллил иширттал министерствалул давриву хьхьичI ххуттайн лавсъсса масъала терроризмалийн ва экстремизмалийн къарши бацIаврил масъала бур. Органнал дуллалисса давурттал лагрулий лявкъуну ва бат бувну бур шанма блиндаж ва террористурал кьюкьрал ярагъ, хъус ва дуки-хIачIия ладиртсса 13 кьюлтIсса кIантту. Бат бувну бур ярагъуннищал данди бавцIусса къачагътурал кьюкьлувасса 18 инсан, увгьуну ур 74 инсан ва органнайн бучIан тIалавшинна дурну дур къачагътурал кьюкьравасса 4 инсанная.
МВД-лул хьхьичI ххуттайн лавсъсса масъаларттавасса ца жяматрал мюхчаншиву дузал давур. ЛяличIисса къулагъас дан багьлай бур балугъравун къабивминнал дуллалисса тахсиркаршивурттах, аьрххи-ххуллийн бувкминнал мюхчаншиву дузал даврих, — бувсунни АхIмад Баталиевлул.
Рамазан ЖахIпаровлул барчаллагь увкунни республикалий мюхчаншиву дуручлачисса виваллил иширттал министрнахь ва цинявппагу зузалтрахь.

— ХьхьичIсса шиннардих бурувгун, республикалий чIалансса паракьатшиву хьунни. Инсантураща, нигьа къабувсун, жяматийсса кIанттурдайн буклан, оьрчIащал сайр буллан бюхълай бур. Ва жула ихтиярду дуруччай органнал биялдарал ишри, — увкунни ванал.
Ахирданий, къуллугърал бурж лавайсса даражалий бартбигьлай, ххуйсса ккаккияртту чIалачIи дур­сса, хьхьичIунсса зузалтран дуллунни наградартту – ХIурматрал грамотартту, Барчаллагьрал ча­ъарду, Дагъусттаннал БакIчи Владимир Васильевлул чулухасса цIакусса ссятру.