[dropcap]А[/dropcap]вгустрал 24-26-нний Иркутскаллал областьрай Иркутск шагьрулий хьунтIиссар Къапкъазуллал культуралул фестиваль. Му дуллалиссар президентнал грантрал харжлугърацIух ва Иркутскаллал областьрал ХIукуматрал кабакьаврицIух, областьрал личIи-личIисса министерстварттал ва идарарттал хIалашивруцIух.
Бадрижамал Аьлиева
[dropcap]Ф[/dropcap]естивальданул сакиншинначину дур «Зунттал Билаят» тIисса цIанилусса Иркутскаллал региондалул жяматийсса организация.
Фестивальданул программа дур шанма гьантлийсса. Му мутталий областьрал центрданий хьунтIиссар элмийсса конференция, спортрал бяст-ччаллу, миллатрал дуки-хIачIиялул ккаккия (дегустациялущал ва мастер-классирттащал), мукунна «Ккавкказуллал галерея» ва «Ккавкказуллал тIабиаьт» тIисса выставкартту. Фестиваль къуртал хьунтIиссар хъуннасса концертрайну, гьурттучитуран ва личIи-личIисса бяст-ччаллаву хьхьичIун ливчуминнан бахшишру дулаврийну.
[dropcap]Ф[/dropcap]естивальданул агьамми мурадру бур цайми миллатирттал халкьуннан Rкавкказуллал культура кIул даву, мунийхчIин му региондалий ялапар хъанахъисса личIи-личIисса халкьуннал дянивсса дусшиврул арарду, кувннан кув бувчIлачIаву цIакь шаву, жагьилтурал дянив экстремизмалул ва ксенофобиялул мархри татан къабитаву, творчествалийхчIин оьрчIру Ккавкказуллал халкьуннал аьдатирттацIух, тарихрацIух гьан баву.
Фестивальданул даву дайдишиннин дуван дакIнийсса давурттугу дур: масалдаран, областьрал дуклаки оьрчIал дянивсса «Къапкъаз оьрчIал ярунних» тIисса цIанилусса суратирттал конкурс ва «Ттул Къапкъаз» тIисса цIанилусса оьрчIал творчествалул давурттал конкурс.
