ЦIарал пишакар

Нанисса шинал сентябрь зуруй хьунтIий дур «ЦIарая мюхчан баврил Аьрасатнал хьхьичIунсса пишакар – 2018» цIанилусса Щалагу Аьрасатнал цалчинсса конкурс.

А. Аьбдуллаева
Ванил сакиншинначиталну хъанай бур Башкирнал захIмат буруччаврил институт (Институт охраны труда, экологии и безопасности на производстве), Аьрасатнал Граждан обороналул иширттал министерство, Аьрасатнал ххассалбувултрал союз. Ва даврин кабакьу буллай бур «Пожарное дело» журналданул редакциягу.
Конкурсрал агьаммур мурад бур цIарая мюхчан баврил пишакарнал сий гьаз даву, идарарттал хъуниминнал ва зузалтрал агьалигу, хъусгу цIарая мюхчан даврих ххишаласса къулагъас дан баву.

Конкурсраву гьурттушинна дан бюхъайссар цIарая мюхчан баврил къуллугърай зий дачIи шинаяр чIивисса хIал къавхьу­сса пишакарнаща, цувагу Аьрасатнал аьрщарай сияхIрайсса вазузисса идаралийсса.
Конкурсраву гьуртту хьун ччиминнаясса аьрзри кьамул буллалиссар сентябрь зурул 16-ннийн бияннин
ва адресрай: e-mail pr@вmipk.ru.

Сентябрь зурул 5-ннийнин регистрация дурминнащал сентябрь зурул 6-нний ва 13-нний пробное тестирование хьунтIиссар (ссят 10-нния 13-ннийн бияннинсса чIумуву) деморежимрай.
Конкурс хьунтIиссар сентябрь зурул 20-нний, электрон форматрай дистанционный тестирование дурну. Му кьини, ссят 10.00 хьусса чIумал цинявппагу гьуртту хъанахъиминнан тIитIинтIиссар тестру.

ХIасиллу дантIиссар автомат режимрайсса программалийну. Ххув хьуманан ккалли­ссар яла чIявусса баллу лавсъма. 1-сса, 2-сса ва 3-сса кIанттурду бувгьуминнан булунтIиссар дипломру ва «ЦIарая мюхчан баврил хьхьичIунсса пишакар – 2018» тIисса цIа.
Ххал бантIиссар личIи-ли­чIисса номинациярттай ххув хьумигу, мукунма «Конкурсрал яла жагьилма гьурттучи», «ЦIарая мюхчан баврил къуллугърай чIярусса шиннардий зузима». Конкурсрал хIасиллу ва цIарая мюхчан баврил Аьрасатнал хьхьичIунсса 100 пишакарнал цIарду рищунтIиссар печатьрай.