ПаччахIлугърал хъус мюнпатну ишла дуллан

Июльданул 23-нний ДР-лул БакIчинал кIанайма Владимир Васильевлул дунни гьарца нюжмардий цал дайсса планерка. «ПаччахIлугърал хъус мюнпатну ишла даврил масъала – Да­гъусттаннан яла агьамминувасса ца хъанахъиссар», — увкунни, ми­кку хьхьичIмахъ лахълай, Владимир Васильевлул.


Му масъалалул хIакъираву хъунмур ихтилат бунни Дагъусттаннал вице-премьер – хъуслил министр Екатерина Толстиковал. Мунил бусаврийну, паччахIлугърал хъус мюнпатну ишла даврил даража лахъ баншиврул давуртту дуллай бивкIссар, 19 ххуллу язи бувгьуну, дурссар 66 журалул даву, миннувасса агьамми давуртту бартдиргьуну дур.

Мунил бувсунни паччахIлугърал хъус тIайла дакъа ишла даврил мисаллугу. «Масалдаран, кIизивулийсса къатрал цалчинмур зивулий бувну бур тир, кIилчинмур зивулий тIурча, халкь яхъанай бур. Му объект ларсун дур 2018 шинал приватизация даврил прогнозрал пландалийн. Мунил приватизация цукун дайссар?» — кунни мунил. Мунил пикрилий, чIяву-чIявусса контролертурал, ревизортурал цалла даву дагьайсса куццуй къадуллай бивкIун бур.

Министрнал бусаврийну, бартбигьин аьркинсса хъиривмур масъала хъанай бур паччахIлугърал аьрщарал участокирттал инвентаризация даву. Муниха зунтIий бур августрай. Бувсунни ДР-лий душиву 3048 аьрщарал участок, миннул аьм­сса лагру душиву 1 млн. ва 700 гектар. Миннувату 1 млн. ва 600 гектар дур кIинтнил даэрдал аьрщив. Ми цIана цукун ишла дуллай буссарив кIулну бакъар. Мунияту муниципалитетирттащал цачIу дан аьркинни инвентаризация ва ххал дигьин иширайну цукун ишла дуллай буссарив аьрщив.

Екатерина Толстиковал гьаз бунни ДР-лий хъуслил заллушиврул ихтиярдал документру дузал баврил масъалагу. Ххал бивгьунни мукунма идарарттал хъуслиясса мюнпат ххи баврил масъалагу.
Мива масъаларттал хIакъираву ихтилат бунни Дагъусттаннал Счетная палаталул председатель Билал ЖахIпаровлул. Мунал бувсунни паччахIлугърал хъуслил каялувшиврий дусса диялдакъашивурттая.
БатIаврий ихтилатру бунни цаймигу министртурал ва районнал бакIчитурал.

ХIадур бувссар
ХI. Аьдиловлул