ХIакьсса лакку балайрдал мажлис

[dropcap]И[/dropcap]юнь зурул 25-нний Лакрал театрдануву хьунни Дагъусттан Респуб­ликалул магьирлугърал лайкь хьусса ишккакку Жанна Кьурбановал творчествалул мажлис. Му сакин хьуну бия кIива бутIуя – кIунулул давурттал ккаккия ва халкьуннал балайрдал концерт.

Зулайхат Тахакьаева
Ва кьини Лакрал театрданувун бувкIуна Жанна Кьурбановал даврил уртакьтал, дустал-гьалмахтал, ванил творчество ххирами.
Театрданул жанахIравун лархъсса Жаннал кIунурдай щаршсса суратру дия буттал кIанттул ссихI бу­сса: вана бюхттулсса ПпабакIу зун­тту, ардарав канакисса ятту, ПартIу ПатIима, синааьрщарал ссигъа кIулсса бархъара щарсса ва чIярусса цаймигу давуртту.

Жанна Кьурбановал творчествалия ва захIматрал ххуллиятугу бувсун, мажлис тIивтIуна Лакрал театрданул директор МахIаммад ХIусайновлул.
Дагъусттан Республикалул культуралул министрнал хъиривчу Мурад ХIажиевлул кIицI лавгуна Жанна Кьурбанова бушиву республикалул магьирлугъ хьхьичIуннай дан личIи-личIисса арардаву чялишсса гьурттушинна дуллалисса инсан. Мунихлуну министерствалул чулуха буллунни диплом ва арцуйну­сса бахшиш. Бахшиш дуллунни рес­публикалул культуралул зузалтрал профсоюзрал комитетрал хъунмур Марзижат Буттаевалгу.

Мажлисрай ихтилатру бувсса Аьрасатнал лайкь хьусса художник Ибрагьим-Халил Ссупиянов, халкьуннал шаэр Космина Исрапилова, «Дараччи» фондрал хъунмур Гульшан Хасаева ва цаймигу Жанна лащан буллай бия зунттал марцIсса щаращуха.
Выставка сакин дурминнахь ва миккун бувкIминнахь барчаллагь увкуна Жаннал ниттил Жавагьи Кьурбановал.
Выставкалия махъ дия халкьуннал инструментирттахун тIутIисса хIакьсса лакку балайрдал концерт. Балайчинахун руцлай бия Дагъус­ттаннал магьирлугърал лайкь хьу­сса зузалт Карин Кадинаев (аккордеон), Амрет ХIусайнаев (мандолина), Индира Зайдиева (флейта), Башир Багьауттинов (пандур), Ися МахIадов (зюннав) ва Лакрал театр­данул артист Ислам МахIаммадов (дачIу).

ХIакьсса лакку балайрдал мажлис хьунни га кьини Лакрал театрдануву. Жаннал увкунни, цила тIийкун, авадансса лакрал поэзиялува яла язими мукъурттийсса, халкьуннал ва хасну лакрал композитортурал макьаннайсса балайрду. Ванил чIарав бацIан бувкIсса ХIажиаьли ХIажиаьлиевлул, Луиза Шагьдиловал, Саният Рамазановалгу увкуна лакрал халкьуннал балайрду. Мажлис чIюлу бувна Дагъусттаннал лайкь хьусса артист Ися МахIадовлул каялувшиндаралусса «Зунттал макьанну» тIисса цIанилусса душварал къавтIаврил ансамбльданулгу.