Аьрасатнал аьрали тарихрава

1916-ку шинал июнь зурул 4-нний Цалчинмур Дунияллул дяъвилий генерал Алексей Брусиловлул каялувшиндаралу Аьра­сатнал аьралуннал Австриянал, Венгриянал ва Германнал аьралуннайн гьужум бувну бур.

[dropcap]В[/dropcap]а Цалчинмур дунияллул дяъвилий яла тIайлабацIу бумур операция хьуну бур.
Хъунама главнокомандующийнал штабрал тIисса так аьрщи дуручлай, мюхчан хъанай бацIансса пикрилуцIун къаавкьуну, Брусилов гьужум бан аьркиншиврий дакI дарцIуну ивкIссар. Цува аьралуннал хъунаману ивтун нюжмар шайхтува, ванал баян бувссар Николай II паччахIнайн, гьужум бансса ихтияр цахьхьунма дуллай бакъахьурча, цаяту аьралуннал каялувчи хIисаврай мюнпат къабикIантIиссар ва цал къуллугъ кьабитантIиссар куну. ПаччахIгу, аьрали советгу БрусиловлуцIун бавкьуссар.

***
1855-ку шинал июнь зурул 18-нний, Севастополь шагьру буручлай, Аьрасатнал аьралуннал бацIан бувссар Малахов Кургандалийн гьужум бувну нанисса ингилиснал, палангнал ва туркнал аьрал.
Къиримнал дяъви нанисса чIумал, чIалан бивкIссар бачIи жазиралий яла къизгъинми талатавуртту хьуншиву Севастополь шагьрулул цIанийсса. Севастополь канища буккарча, Къиримнал дяъвилий Аьрасатнал ­аьрал бух хьушиврун ккалли бан бучIину бивкIссар. Оьруснал ­аьрал му талатавриву бух хьу­ссар ингилиснал ва палангнал аьралуннаяр. Мунин сававнугу хьу­ссар муттаэнал аьрал техникалул чулуха оьруснал аьралуннаяр балгуну бикIаву.
Севастополь ва Малахов Курган бацIаву дакъасса битлатаврил эяллайн кIура баен бувссар.
Малахов Кургандалий оьрус­нал аьралуннаща байщун бан бювхъуссар гьужум бувну наними.

***
1941-ку шинал июнь зурул 22-нний кIюрххицIун ссят 4-нний фашист Германнал аьрал хар-хавар бакъа ххявхссар Совет Союзрайн. Ва кьини байбивхьу­ссар Буттал кIанттул цIанийсса Хъунмасса дяъви. Июнь зурул 23-нний Москавлив сакин був­ссар Хъунмур командованиялул ставка – Ставка Главного командования (махъ Ставка Верховного главнокомандования тIун бивкIссар).
Билаятрай щала власть июнь зурул 30-нний сакин бувсса ГКО-лул (Государственный комитет обороны) кIунттихь диркIссар. ГКО-лул Председательну ва Верховный Главнокомандующийну ивтссар И.В. Сталин. Душманнайн данди бацIансса чаран ляхълай, билаятрай сукку дурссар «Все для фронта! Все для победы!» тIисса программа.

***
Июнь зурул 29-нний Аьрасатнаву дакIнийн бичайссар Буттал кIанттул цIанийсса Хъунмасса дяъвилий душманнащал талай бивкIсса партизантал ва подпольщиктал.
Ва кьини 1941 шинал СССР-нул Совнаркомрал ва ВКП (б)-лул ЦК-лул Директива дуркссар душманнал канихьсса аьрщарай партизантурал кьюкьри сакин даврил хIакъиравусса.
ХIадур бувссар
А. Аьбдуллаевал