[dropcap]Б[/dropcap]ургъия буруччайсса кремрая бурувччуну бикIан Американал Гавайя штатрал губернатор Дэвид Айджлул къулбас дурну дур бургъия буруччин ишла дайсса цаппара кремру кораллал рифирдан заралссар тIий, ми ишла даврий, даххаврий къадагъа дуллалисса закондалий.

[dropcap]О[/dropcap]ксибензон ва октиноксат тIисса химиялул затру дур миннуву ва ми дусса кремирдая хьхьирил чIанулусса кораллал рифирдан зарал бусса бур, ми кремругу дурккун, инсантал хьхьиривун бучIлачIаврийн бувну. Уттинин Американаву укунсса закон кьамул дурну дакъар.

Ттуруллив дарцусса щилли, цукунни?
Ираннал граждан обороналул къуллугърал хъунама, генерал Голам Риза Халали Израиллал вакилтурай тахсир ккаклай ур, миннал гъарал лачIун нанисса ттуруллив дарцуну дур тIий. Аьлимтурал хъиривлаявурттайнгу чул бивщуну, му ур, «ци байссарив бувну, израиллал ираннал ссавруннайн ттуруллив диян къаритлай бур» тIий. Генерал ур Авгъанисттаннал ва Дякьирийсса хьхьирил дянив­сса циняв зунттурдай марххала бур, так Иранналми зунттурдай личIаннин тIий. Мяйжан­ссар, тайннал метеорологиялул къуллугърал хъунама ур, элмулул хIасиллу хIисавравун ларсун, «марххала ва ттуруллив дацин къашайсса затрур», къурагьшиву ччимур билаятрайн ликкан бюхъайсса балари, цуркинтращал миннул цичIав иш бакъа­ссар тIий.

Азирбижаннай ттукI бухлавгун бур
Гужсса кIиришиву духьувкун кондиционерду лахълахъаврил гуж багьну, Азирбижаннаву цал архIал чIявусса электростанциярттай аварияртту хьуну дур. Хъунисса шагьрурду ттукI бакъа ливчIун бур. Бакуй, масалдаран, метро бавцIуну, вагоннаву ливчIсса инсантал буккан буллан багьну бур.

Великобританиянаву юбкарду къалахлантIий бур школарттайн
Великобританиянаву 40 школалул дуклаки душваврай школарттайн юбкардаву занан къадагъа дирхьуну дур. ОьрчIругу, душругу хIажакирттаву занан тIалав бувну бур. Юбкарду лавххун школарттайн заназисса трансгендер оьрчIру кьюкьин къабулланшиврулсса тIалавшиннар тIий бур школардал директортал. Мяйжанссар, Оксфордшир тIисса графстволий оьрчIахь юбкардаву школарттайн занансса ихтияр ду­сса дур, дуклаки оьрчIал – трансгендертурал ихтиярду ссуссукьу дуллан къабучIиссар тIий бур му графстволул хъуними.