Жулла республикалий июньдалул 17-нний дайдирхьунни июньдалул 23-ннин лахъи лагантIисса фольклорданул ва аслийсса культуралул Дунияллул халкьуннал дянивсса
«Горцы» тIисса фестиваль.
[dropcap]С[/dropcap]портралмур дунияллий ца яла яргмур, агьаммур ишну футболданул Дунияллул чемпионат духьурча, культуралулмур аралуву цIанасса чIумал хъунмур иширан ккалли дувансса давуну хъанай дур Словакиянавасса, Польшанавасса, Румыннавасса, Азирбижаннавасса ва Аьрасатнал коллективру гьурттусса «Горцы» фестиваль.
Бадрижамал Аьлиева
Фестиваль дуллалиссар 2012 шиная шиннай ЮНЕСКО-лул эгидалий, ПаччахIлугърал Аьрасатнал Халкьуннал творчествалул къатлул, ДР-лул Культуралул министерствалул ва Республикалул Халкьуннал творчествалул къатлул, ЮНЕСКО-лул иширтталсса байсса АьФ-лул Комиссиялул Дагъусттаннал отделениялучIасса къаматериалнайсса Культуралул ирсирал комитетрал сакиншиндарайну. Ва ххуллухсса фестиваль хас дурну дия халкьуннал шаэр Расул ХIамзатовлун 95 шин шаврин.
Фестивальданул цIушиннану хьунни «Кавказ мастеровой» цIанилусса цIусса проект. Му проект тIитIлатIисса выставка-ярмаркалий дия авурсса, ца ккарккун, гамур хъамадитансса давуртту, жулла хъамаллурал ва Дагъусттаннал усттартурал карунних дурсса. Му кьини миннал дянив баян бувна «Традиция» цIанилусса конкурс. Конкурсрайнсса даву дуван усттартуран ккаккан дурну дия ца ва дачIи хьхьу-кьини. Миннал давурттан кьимат бищун ккаккан бувну хасъсса жюригу. Конкурсрал гран-приран лайкь хьунни Краснодардал крайраясса усттар Татьяна Ткаченко: ШагьналлачIал ялттусса ккирттая ванил дурну дия эмаратсса давуртту, конкурсрайн дурмур давурив дия «Лезгинка» тIисса.
«Кавказ-мастеровой» выставка-ярмаркалувух гьурттуну ия 33 усттар: миннава Дагъусттаннаясса – 22 (вайннавух жула Ахъушиял райондалийсса Бархъаллал ва Хъюллал шяравасса Магьият Давудовагу, Земфира Мусаевагу ва Зугьра ХIусмановагу); Аьрасатнал регионная увкIсса ия 11.
Выставка-ярмаркалия махъ фестивальданул цалчинсса кьини жулла республикалул хъунмур майданналив хьунни коллективирттал парад. Мичча къавтIавурттащал, балайрдащал бавчуну, Р. ХIамзатовлул цIанийсса проспектрайх гихунмай най, фестивальданул гьурттучитурал личIи-личIисса халкьуннал костюмирттайну, ттугъайну, балайрдайну республикалул хъуншагьру чIюлу бувна. Ва хьунни халкьуннал мяйжаннугусса байран.
Оьруснал театрданул хьхьичIсса майданнив цачIун хьуну, ДР-лул ХIукуматрал председательнал цалчинма хъиривчу Анатолий Карибовлущал, ДР-лул культуралул министр Зарема Буттаеващал ва мунил хъиривчу Марита МухIадовал циняв коллективирттал рирщунни аьмсса сурат. Хъирив театрданул хъунмур залдануву хьунни «Горцы» фестиваль тIитIлатIисса гала-концерт. Му дайдишин хьхьичI республикалул бакIчи Владимир Васильевлул чулухасса фестивальданул гьурттучитал ва сакиншинначитал барча буллалисса махъ лавхъунни Анатолий Карибовлул.
Фестивальданул адресрайсса барча бавуртту дуркIунни ЮНЕСКО-лул иширтталсса байсса Комиссиялул Жаваблувсса секретарь Григорий Орджоникидзел, АьФ-лул Президентнал культуралулми иширтталсса бувайсса маслихIатчи Владимир Толстойл, АьФ-лул культуралул министр Владимир Мединскийл чулухагу.
Фестивальданул лагрулий дуллалисса давурттава ца яргмурну дур гьарца кьини ахттакьуннай Яруссаннал театрданул хьхьичI ккаккан дуллалисса концертру.
