[dropcap]К[/dropcap]куллал райондалул Ветуправлениялий зий бур хъинну цала даву канилух дурксса пишакартал. Ванил баранугу хъанай дур махъсса шиннардий райондалий цукунчIавсса ятту-гъаттарал лахъай цIуцIаву ппив хьун къадитаву.
Хъун неххал ухссавнил чулийсса ххюра (Хъювхъиял, Къяннал, Вихьуллал, Ссухъиящиял, ЦIуйшиял) шяраваллил инсантурал ятту-гъаттарал ялув дарцIуну дур Вихьуллал шяравусса Ветучасток. Участокрай каялувшиву дуллай ур 45 шинай цала касмулий зузисса МахIаммадов Шяъван. Шикку мукунма зий бур Буттаев Карин ва Аьлиев Хизри. Уттигъанну на Шяъваннухь цIувххуссия: «Цукун бувкри зул канилусса ятту-гъаттара кIинтнива?».
— Жул ветучастокрайн дагьлай дур Вихьуллал, Ссухъиящиял, ЦIуйшиял, Хъювхъиял, Къяннал шяраваллу. Вай шяраваллаву, аьмну лавсун, инсантал ябуллай бур 1000-нния ливчусса лухIи гъаттара, 5000 яттил хIайван, 60 ттукку, 142 балчан, 600 най ва цаймигу ичIаллил хIайвант. Жу цавагу ичIаллил хIайван бивчIан къабитарду. Амма шиккува кIицI буван ччива махъсса шиннардий хъинну чан хьуну бушиву шяраваллаву яхъанахъисса жагьилсса инсантал.
ЧIявуми бур бугьарасса инсантал. Гъаттаравун дарув бутIин, оь ласун аьркинсса чIумал, га бугьан бюхълай бакъар вайннаща. Цукун бухьурчагу, жу жула буржру биттур буллай буру. КIинтниватугу ливчуну, вана интнийн буккавай, — тIий ур Шяъван.
