ЦIусса центр – цIусса мурадру ва каширду

[dropcap]В[/dropcap]ай гьантрай Дагъусттаннал медициналул университетрачIа тIивтIунни Реабилитациялул центр, дунияллул халкьуннал дянивсса II-мур элмийсса ва практикалул конференциялул лагрулий.

 

З. АьбдурахIманова
Центрданий хIадур буллан­тIиссар республикалул медициналул реабилитологиялий зунсса пишакартал. Ми хIадур буллалаврицIун центрданий халкьгу хъин буллантIиссар.
ДГМУ-лул ассимиляциялул центрданул цIусса кабинетраву цIана бусса бур зий реабилитациялул 5 аппарат. Вай цивппагу жула хIукуматрай бавтIсса аппаратру бусса бур.

Университетрал вай машан лавсун бур билаятрал медицина уттизаманнул технологиялул щаллу давриха зузисса «Мадин» тIисса компаниялуща. Аьмну 5 аппарат сайки 4 миллиондалун бавцIуну бур. Ухссавнил Ккавкказуллай ттинин цавагу медициналул вузрачIа бувассар тIар укунсса журалул центр тIитIин. Жула ДГМУ цалчинмурди ва даву дан бакIрайн ларсъсса.

Шадлугъ тIитIлатIисса ихтилатраву ДГМУ-лул ректор Сулайман Маммаевлул кIицI лавгунни республикалул реабилитациялул медициналуву ца ттигу цIусса ттизаманнул каширду дусса центр ххи хьушиву.
«Цалчинма-цалчин ва центр ххуйсса бахшишри университетрал коллективран. Студентнан чIалан аьркинссар цала пиша ссацIун бавхIусса буссарив, цала даврил мяъна дурчIлан аьркинссар. Практикалул дарсру дакъахьурча, ганая ххуйсса, за кIулсса хIакин хьуншивугу хъунмасса щакри», — увкунни ректорнал.

Уттигъанну ДГМУ-лул коллектив волонтертуращал цачIуну бивну бур «Забота» тIисса интернатрайн. Сулайман Маммаевлул бусаврийну, интернатрал хъунама хIакиннащалсса ихтилатрава кIул хьуну бур шикку мушакъатсса оьрчIащал зунсса хIакинтал-пишакартал биялну бакъашиву.
«Жула буржри мушакъатсса, психологиялул кумаграх мюхтаж­сса оьрчIан кумаг бан. Интернатрал хIакиннащал жу икьралгу дарду психологиялул факультетрай махъва-махъмур курсирай ккалаккисса студентътал оьрчIащал зузи бансса», — ххи бувунни Маммаевлул.

ДР-лул цIуллу-сагъшиву дуруччаврил министрнал хъиривчу Пайзуллагь ХIабибуллаевлулгу чIурчIав дурунни цала ихтилатраву цIусса центрданул гьанулий практикалул медициналуву зунтIисса жагьилсса хIакинтал хIадур буллан бюхъантIишиврий.

Центрданий бюхъантIиссар инсульт, инфаркт хьусса халкьуннан кумаг бан, мукунма – ликкур­ттай, туннурдай цIунцIияртту хьуминнангу. Шикку дусса дур цайнува цивппа занакьулу хьун къашайсса къашайшалтрансса тренажердугу.
Ректорнал бусаврийну, центрданул каширду вания гихуннайгу гьарта-гьарза дуллансса кьас­ттирай бур.