«Даврил бурж лайкьну биттур бавур ттул мурад»

Агьали кьамул байсса нюжмаркьини МахIачкъала шагьрулул Кировский райондалул прокурор Светозар ОьмаровлучIан бучIай чан­ма-чанну зувинная ливчусса инсантал.

Прокуратуралул полковник, Аьрасатнал юстициялул хъунама советник, Аьрасатнал Федерациялул прокуратуралул бусравсса зузала, Оьмардул арс Оьмаров Светозар увну ур 1969 шинал Щардал шяраву. Школа къуртал бувну махъ лавгун ур аьралуннаву къуллугъ буллан. ЗахIматрал ххуллу байбивхьуну бур МахIачкъала шагьрулул радиозаводрай.

Гихунай, «Гранит» тIисса дахху-ласулул ассоциациялул центрданийгу зий, архIала дук­лай ивкIун ур ДГУ-лул юридический факультетрай. Му къуртал байхту, кьамул увну ур Аьра­сатнал прокуратуралул органнайн, зий айивхьуну ур Лакрал ва Ккуллал районнал прокурорнал кумагчину. 2007 шинал ивтун ур Лакрал ва Ккуллал районнал прокурорну ва му даврий зий дурну дур 10 шин.

Кировский райондалул прокуратуралийн 1690 аьрза бувкIун бия 2017 шинал. Нава зий ивкIсса кIирагу лакрал райондалий шинал лажиндарай бучIайсса 60-70 аьрза хIисав барча, учин бучIир кIийсса даву даврин ккалли данссарагу къадиркIун дур куну.


ЧIун ляхну агьали кьамул бан Гъумукун бувкIсса респуб­ликалул прокуратуралул зузалтрал кIицI лагайва Светозар даврий низам дусса, къуллугърал буржру жаваблувну биттур буллалисса, лавайсса даражалул пишакар ушиву.
Шин ва дачIи хьунни Светозар Оьмаров МахIачкъала шагьрулул Кировский райондалул прокурорну ивтун.
Агьали кьамул байсса нюжмаркьини ваначIан бучIай чан­ма-чанну зувинная ливчусса инсантал.

— Светозар, цIусса лагрулул къуллугърай захI­матшивурттугу, къайгъурдугу ххишаласса бухьун­ссар. Паракьатшиву ххи­сса Лакрал ва Ккуллал районнаяту увкIшивугу хIисав дурну.
— Укунсса даврий бигьашиву тачIаврагу къадикIайссар. Цайми низам дуруччай органнащал цачIуну прокуратуралул диял­сса давуртту дурссар Кировский райондалул территориялий закон ва низам цIакь дан.
Хъунмур къулагъас ду­ссар коррупциялийн къаршину ба­цIав­рих, кIанттул силистталул органнал законну биттур даврих ва миннул ялув бацIаврих, инсаннал ихтиярду ва тархъаншиву дуруччаврих. Гьай-гьай, ца яла тIалавшин хъуннамурну хъанахъиссар экстремизмалийн ва терроризмалийн къаршину бацIаврилмур арагу, профилактикалул давурттугу хIисавну. ЭкстремизмалуцIун ва терроризмалуцIун дархIуну арулла дело дуссар судрайн дуллуну.
ТIайлассар, даврил лагругу лап хъунна хьунни. Кировский райондалийн дагьлай дур МахIачкъала шагьрулул цIусса микрорайонну: Научный городок, Учхоз, Черные камни ва МахIачкъала шагьрулучIан гъансса поселокру: Ленинкент, Семендер, Щамхал, Щамхал-Термен, Сулак, Богатыревка, Красноармейское. Шикку ялапар хъанай бур 250 азарунния ливчусса инсантал. Му аьдад­ран лавхьхьусса аьрзригу, туну, букIлакIиссар инсантурая. 1690 аьрза бувкIун бия 2017 шинал. Нава зий ивкIсса кIирагу райондалий шинал лажиндарай бучIайсса 60-70 аьрза хIисав барча, учин бучIир кIийсса даву даврин ккалли данссарагу къадиркIун дур куну.

— Гьарца нюжмаркьини сайки зувинния ливчу­сса инсантал букIлай бур вичIан. Цуми бур миннал яла цIуцIими буру­ккинтту?
— Аьрщи ягу къатри кIиннан-шамуннан дарххусса ишру. Аьрщарал закондалийн багьайсса буруккин – му бур яла захIматсса ва тачIаввагу яла къалагайсса масъала. 99 аьрза бувкIун бия аьрщарал закон лиян даврийн багьайсса. Миннува аьрзри буллуминнал чулий щаллу бувссар 8 аьрза.
— ТачIаввагу яла къалагайсса оьсса буруккин бур цамургу – коррупция. Мунищал талатисса цаймигу дур структурарду. Амма хъунмур хъар прокуратуралийн дагьлай духьунссар.
— ЖучIан дуркIунни коррупциялийн дагьайсса 52 уголов дело. Хасну жура, прокуратуралул, дурсса ххалбигьавур­ттайн бувну, сукку дурссар кIира дело. Судрал ххал дурну, хIукму кьамул бувссар 54 делалул ялув. Махъсса чIумал коррупциялул ялув бацIаву кьянкьасса ду­ссар, билаятрал хъунама Прокурорнал ва Президентнал амрулийн бувну.

— Ялагу ци журалул аьрз­ри букIлай бур агьалиная?
— ЗахIматрал закон лиян даврийн багьайсса ххал бивгьуну бур 17 аьрза, миннува аьрза буллуминнал чулий щаллу бувну бур 4.
ЖКХ-лул закон лиян даврийн багьайсса ххал бивгьуну бур 31 аьрза, миннува 1 аьрза – буллуманал чулий.
Балугъравун къабивсса оьр­чIал ихтиярду ссуссукьу даврийн багьайсса ххал бивгьуну бур 8 аьрза, миннува ца щаллу хьуну бур аьрза буллуманал чулий.
Ххуллурдай мюхчаншиву дуруччаврийн багьайсса ххал бивгьуну бур 7 аьрза, миннува 4 щаллу бувссар аьрза буллуманал чулий.
Пенсиялийн багьайсса суаллал ялув ххал бивгьуну бур 4 аьрза.
Силистталул ва дознаниялул органнал даврил хIукмулий рязи бакъасса 213 аьрзалува буллуминнал чулий щаллу хьу­ссар 86.

— Чансса хьунабакьлай бакъар жучIава муша­къатминнал ихтиярду ссу­ссукьу дуллали­сса ишру? Мунил ялув бацIаву цукунсса дуссар зул чулуха?
— ЧIун ляхну на ттучIанма оьвкуну участковыйтурайн, мин­найн тапшур байссар, цала-цала районнай ялапар хъана­хъисса мушакъатсса инсантурал сияхI дурну, миннал ужагъир­ттайн бивну, ичIаллил шартIру, паччахIлугърал миннан ккаккан дурсса хIаллихшиннардал щаллушинна (учиннуча коляскардал, дарурттал) цукунсса дурив ххал дан.

— Цир вил даврил принцип?
— Прокурорнал пиша язи бувгьусса инсаннал даврил дикIан аьркинссар так ца принцип – закондалул ххуллий зун. Даврил бурж лажин кIялану биттур бавур ттул даврил принцип.

— Буси вила прокуратуралул коллективраягу. Цукун кьамул увра ина миннал?
— Прокуратуралул коллектив сакин хьуну бур 22 инсанная. Миннава увагу ца ур ла­ккучу – прокурорнал хъиривчу, ОьмархIажинал арс Шиллаев Бадави, НицIавкIратусса. Цала даву кIулсса ххаллилсса пишакар ур.
— Барчаллагь хъунмасса, Светозар. ТIайлабацIу баннав вин къабигьасса даврий.

Ихтилат бувссар
Зулайхат Тахакьаевал