[dropcap]М[/dropcap]айрал 19-нний Ставрополлай Культуралул ва спортрал дворецраву хьунни «Аьрасатнал студентътурал инт» тIисса щалагу Аьрасатнал ХХVI фестивальданул лауреатътуранбахшишру дуллалисса батIаву.
Бадрижамал Аьлиева
Фестивальданул сакиншинначиталну бия АьФ-лул КIулшиву дулаврил ва элмулул министерство, АьФ-лул Культуралул министерство, Жагьилтурал иширтталсса байсса Федерал агентство, «Аьрасатнал Жагьилтурал Союз» тIисса цIанилусса Щалагу Аьрасатнал жяматийсса организация, Ставрополлал крайрал ХIукумат.
Конкурс нанисса шанмагу гьантлул дянив Аьрасатнал 80 региондалиясса 2700 гьурттучи талай ивкIссар язими студентътурал цIардахлу. Жюрилуву тIурча, бивкIссар билаятрай ва мунил кьатIув цIа ларгсса актертал, хореографтал, артистътал, режиссертал, продюсертал. Миннал ххал бувссар сайки 900-ннийн бивсса номерду. Жюрилул дурсса хIасиллайн бувну, «Халкьуннал вокал. Фольклорданул балай» номинациялий «ТIитIа чIавахьулу» тIисса номерданухлу II даражалул лауреатнал цIанин лайкь хьунни жула республикалиясса студентка ПатIимат Мажидова. Мува даражалул дипломран къавтIаврилмур номинациялий «Яруссаннал къавтIаву» номерданухлу лайкь хьунни «Ккавкказуллал барзунттив» («Вершины Кавказа») цIанилусса ансамбль.
Мура кьини маркIачIаннай хьуссар фестивальданул гала-концерт, цийгу тамашачитурал ххал бувсса студентътурал язи-язими номерду. Ставрополлал шагьрулий Аьрасатнал регионнал хьхьичIунми, гьунар буми жагьилтуравух цалва гьунарду ккаккан буван лайкь хьунни Дагъусттаннаясса делегациягу. Халкьуннал хьхьичI яргсса къавтIаву ккаккан дунни «Ттул Дагъусттан» тIисса ансамбльданул.
Хъиривмур «Аьрасатнал студентътурал инт» цачIара дувансса ихтиярданун лайкь хьунни Пермскаллал край. Умуд бур 2019-ку шиналмур фестивальданийгу жула студентътурал хьхьичIунсса кIанттурду бугьаншиврийн.
