Шакилданул барашин

[dropcap]И[/dropcap]нсанная цIа дан ччисса чIумал: «Га утта-лахъи бищун кIулсса ур», — учай. Буниялагу, жула зунттаву яхъана­хъисса хъамитайпалуща дуван къашайсса даву дакъани кунна чIалан дикIай. Ваччиял шяравасса Мутаева Саидат Ширванинал душ 1975-ку шинал зий бивкIун бур ЦIуссалакрал райондалий ЦIуссаккуллал шяраваллил Лениннул цIанийсса колхозрай оьллуттизуну.


ХIажимурад ХIусайнов
[dropcap]Б[/dropcap]юхъай уттисса шагьрулул инсантуран, телевизорданувух ккаккан дувайсса гъаттарал пирмарду ххал шайхту, ва касму бигьасса дуни кунна чIалай дикIан. Амма му мукун къабивкIссар. Оьлища накI ттизаву дакъа, га марцI буван, дукия дишин, хъут дукьан багьлай бивкIссар. Мукун ца оьллуттизухь бивкIссар 10-11 оьл.

[dropcap]Я[/dropcap]вара, инсаннан ба­къагу, гъаттарангу ххирассар цивппа ххира-ххуй буллалаву. Вана вай циняв давурттугу дуллай, накI ттизавриву хьхьичIунсса ккаккиярттугу хьун дурну тIий 1975-ку шинал Саидат, цайми Дагъусттаннал хьхьичIунсса зузалтращал, Москавлив тIайла бувккун бивкIун бур Ххувшаврил ттугълищал сурат рищун. Вайннан медаллугу дуллуну диркIун дур.

Гара шинал август зуруй ва щар хьуну бур цала тухумрая­сса инсаннан, Мутахъал Муртазялин. ХIакьину Саидат зий бур райондалул азарханалий марцIшиву дуручлай. Муртазялил ва Саидатлул ччаннай бацIан бувну бур ца арс ва шанма душ. Вайннавату ттун ххуйну кIулли ХIажибутта тIима арс, ва ур Лакрал ва Ккуллал районнал цачIусса военкоматрай зий. Райондалий цIа ларгсса бур вайннал душ Шавлухъ. Ва зий бур Ккуллал райондалул Культуралул къатлуву. Шавлухъ гьур­тту къавхьусса, балай къаувкусса царагу байран, конкурс къашайссар.