[dropcap]И[/dropcap]юнь зурул 19-нний Оьруснал драмтеатрдануву хьунни Дагъусттаннал муфтиятрал ва динийсса иширтталсса буллалисса республикалул комитетрал уртакьну хIадур дурсса Зумаритаврил байран. Микку гьуртту хьунни хIукуматрал вице-премьер Рамазан Жяъпаров, муфтий, щайх АхIмад-хIажи Аьбдуллаев, динийсса иширтталсса буллалисса комитетрал хъунама МахIаммад АьвдурахIманов ва цаймигу бусравсса къуллугъчитал, министерстварттал ва идарарттал вакилтал.
П. Рамазанова
[dropcap]Р[/dropcap]амазан Жяъпаровлул республикалул хъунама Владимир Васильевлул цIанияту барча бунни Дагъусттаннал агьали. Ванал кIицI лавгунни хасну муфтий АхIмад-хIажигу, цайми диннал идарарттал хъунимигу ххуй-ххуйсса давурттив дуллай бушиву, республикалий агьалинал дянивсса нахIушиву дуруччаву мурадрай. Байрандалийн бучIан бувну бия ятинсса оьрчIру, мукунма чIявусса оьрчIру хъуни буллалисса кулпатирттавасса ва ахIвал кIюласса кулпатирттавасса оьрчIру. Миннан цинявннан буллуна исвагьину чIюлу бувсса нахIу- нацIулул кьуцурттив.
[dropcap]И[/dropcap]сламрал кIулшивуртту лахьхьин дуллалисса оьрчIал садикирттал ккаккан дурна ххуйсса программа. Чялишну гьуртту хьуна «Алжаннул лелуххант», «Панда», «Зумрут» садикирттал тарбия буллалисса оьрчIру. Заур СалихIовлул, Сафия Ибрагьимовал, «Хайрат» тIисса оьрчIал группалул ва «Нашидул ислам» группалул щаллу бувна нашидру.
Исламрал темалун хас дурсса суаллал викторина дурна мероприятие дачин дурсса Руслан Абакаровлул. Ккаккиялун дирхьуну дия республикалул «Мяърипатрал мусил кьанунну» тIисса («Золотые правила нравственности») конкурсрай хьхьичIунсса кIанттурду бувгьусса оьрчIал каруннил дурсса давурттив. Байран къуртал дуруна бусурман умматран хъинмур чIа тIутIисса дуаьлийну.
