Жул ччянивасса цIакьсса ва вихшаласса дус, Ккуллал Аьйшаразухъал Абакардул ва Бахул Аьдухъал Сабижатлул душ, Республикалул оьрчIал биб­лиотекалул хъунмур, «Дагъус­ттаннал Республикалул культуралул лайкь хьусса зузала» Алескерова (Султанова) ТIагьират вай гьантрай хьунадакьлай бур оьр­мулул 80 шинал юбилей.

Цурдагу тIайла дацIлацIисса «мукьра ­оьсса кIусса шин» дайдихьлахьи­сса июньдалул 22-мур кьинилийн. Мунияту дяъвилия ппу зана къавхьусса ТIагьиратлунгу був кьини кIура даяй, ччинугу-къаччинугу, яру мукьал буцIин буллалисса кьинилийн.

Ххяххия, ущу-щулгъи, рухI дусса гьарзат чIивинияцIара ххирасса ТIагьират 1955 шинал, буттал шяраву 10 класс буккайхту, ДГУ-лул химиялул ва биологиялул факультетрайн буххаву щинчIав тамаша къабивзуна. Га къуртал байхту 10 шинал мутталий зий буссия буттал шяравусса школалий. Яла ласнащал МахIачкъалалив бивзун, школарттай биологиялул ва химиялул дарсру къаляхълан диркIукун, ТIагьират чIумуйсса зун бивкIссия Республикалул оьрчIал библиотекалий. Хъунмур ва хъинмур кьи­сматгу ванин яла гиккува лявкъу­ссар. ЧIивинияцIа луттирду ккалан шавкь дусса душ, луттирдал караматсса дунияллул ясир бувну, мукьцIаллийсса шиннардил мутталий гъирарай зун бивкIссар цал библиотекарьну, яла отделданул хъунмурну, 2009-ку шиная шинмай тIурча, жаваблувсса хъунмур библиотекарьнал къуллугърай.

ТIагьиратлул дуллалимунил кьимат бивщуну, ганин «Дагъусттан Республикалул культуралул лайкь хьусса зузалал» цIанил ялун дуллуссар цикссагу бахшишру ва хIурматрал лишаннугу.
Гьунар лавайсса музыкант ва цIанихсса композитор цила лас Алескеров Камил-Пашанащал вайннал хъуни бувссар душ Биайна, ганил душ Айнаби ва арс Камил-Паша. ЦIуллу баннав ций, талихI-тирххандарайн бияннав!
ЦIуллу баннав вил бутташиву дурсса, бутта акъашиву кIул хьун къабивтсса ххирасса уссу, ххира­сса ссу, миннал наслу!
Барча, ссувай, вил юбилей!
Вил дуаьчитал: Буржунова Анисат ва Бакриева Асият