[dropcap]И[/dropcap]юньдалул 18-нний МахIачкъалалив Оьруснал драмалул театрдануву хьунни Медициналул зузалал кьинилун хас дур­сса батIаву. Муний гьуртту хьунни республикалул циняв медидарарттал вакилтал.

ДР-лул БакIчинал кIанайма Владимир Васильевлул духтуртурахь барча дунни миннал байран кьини. «Жу циняв зул кIунттихь буссару – дунияллийн лявхъуния ахиратрал хьуннин. Ва залданувун бавтIсса цинявппагу агьамсса пишалул вакилталли, жу зуйн барчаллагьрай буссару жулгу, жул гъан-маччассанналгу оьрмурду буруччаврихлу», — увкунни республикалул хъунаманал.

Васильевлул бусаврийн бувну, Аьрасатнал Президентнал цала Рисалалий кIицI бувну бур билаятрал агьаммур ккаккияну хъанахъишиву оьрмулул лахъишиву. ХIакьину жула билаятрай агьалинал оьрму лахъи хъанай бур, му хъунмурчIин медициналул зузалт­ралгу захIматри.

Яла шадлугърал тагьарданий дуллунни паччахIлугърал наградартту. Цаппара медициналул идарарттал каялувчитуран ва зузалтран дуллунни «Дагъусттан Республикалул лайкь хьусса хIакин» ва «Да­гъусттан Республикалул цIуллушиву дуруччаврил лайкь хьусса зузала» тIисса цIарду.

Муния махъ цалва даврил уртакьтал пишалул байрандалущал барча буллалисса махъ лавхъунни ДР-лул цIуллушиву дуруччаврил министр Жамалу­ттин ХIажиибрагьимовлул. «Зул бюхъулул, бажарданул, пагьму-гьунарданул, инсаншиврул медициналул зузалал пиша жяматраву бунни ца яла бусравмурну», — увкунни министрнал.

Мунал бувсунни цIанасса ппурттуву медициналул идарарттах ва духтуртурах къулагъас цуксса ххи дуллай буссарив ва ялун дучIансса чIумал цукунсса дахханашивуртту дуллантIий буссарив.
Яла ккаккан дурунни концертгу.
ХIадур бувссар
ХI. Аьдиловлул