[dropcap]М[/dropcap]ай зурул цумулчинсса кьини дияв дакIний дакъар, телевизор ххал буллай бунува, «Прибой» каналданувух лакку балай увкуна жула хIурмат бусса балайчи Халисат Батирбековал. Балайлун цIа дакIний дакъар, амму му бия аслийсса лакку макьандалийсса балай. Му къуртал хьуну махъ буцири зукьлурдугу бував Халисатлуха. Валлагь, вин хъунмасса чири хьухьунссар, Халисат. Буттахъал макьандалийсса балайлия, на кунма, ххари хьусса цаймигу бухьунссия.

---

[dropcap]Ж[/dropcap]у, оьрмулул хъунисса инсантал, мякьну бикIару жула ла­кку балайрдах, буттахъал макьаннах, оьрчIний, жагьилний баллай бивкIсса. Амма цIанасса жагьилтуран къаххирар ми. Хъинну дакIнийн кьутIлан бикIай жула ххаллилсса балайчитурал – Марияннул, Ахсар Аьлиевлул, Аьлиоьмар Аьлиевлул, Апанни КьурбанмахIаммадовлул ва ялагу чIявусса цайминналгу тIий бивкIсса, хIакьину ПатIимат Аьлие­вал учайсса, балайрду щаллу буллан махъа нанисса никиран ччай бакъашиву, ми кIулнувагу бакъашиву, ми ккаллину ба­къашиву.

Ттизаманнул макьаннавасса чIяруми дакIнийрагу къаличIай, личIисса тIин-тIааьн бур хьхьичIрами макьаннал, балайрдал. Ссалгу багьарихха Лариса ХIажиевал цила бюхттулсса чIунийну учайсса буттахъал балайрдах вичIи дишин, амма мунилгу нажагь бакъа къаучай ми. Чан-чанну тIий, хIакьсса лакку балайрду, макьанну хъамараритавай дур.
Ча, барчаллагь вин хъунма­сса, Халисат, буттахъал балайлухлу. Ина оьрмулия ххарину битаннав!

[dropcap]Б[/dropcap]учIину бухьурча, ва ттула буттал шяраваллихасса назмугу рирщуну ччива «Илчилий», буттахъал балайрдаясса пикрирдацIун бакIраву хIасул хьусса. Жагьилсса чIумал гьарца гъинттул лагайссияв щалагу Лакку улча чIалачIиний, щюлли бакIуй, дирхьусса буттал шяравун – Читтурув. Утти чур­ххай хIал чан хьуну бур, къашай гьан Лаккуйнгу. Амма Ла­кку кIанугу, буттал шяравалугу тачIав дакIния къадуккай.

Аман хьурдай учара

Аман, хьурдай учара
Леххан ттуйра хъаттирду,
Ччан бивкIни, гьава буван
Ххира буттал шяравун.

Щалихханнин щябикIан
Читтурдал лахъ муруллий,
Хьхьучанихьун ялугьлан
Ссав дурцIу чаннацIурттах.

Ялагу хьурдай чара
Щалихханнин щябикIан
Гъидайдихьулул гьантрай
КIа Читтурдал Дуцурттуй.

КIа дюхлулсса, тIааьнсса
Жула лакку гьаварай,
КIай аьтрилул кьанкь дусса
ОьрчIи тIутIал дяниву.

Хьурдай чара ялагу,
Лаккуй гъарал ларчIун махъ,
Лакку дарардайх бивтсса
Ссурулккуртлух ябитан.

Ялагу хьурдай чара,
Гъарал вирххулуя махъ,
КIай кисаран чIапIайсса
Хьхьемал кIунтIах ялугьлан.
Маймунат Чалабова,
ш. МахIачкъала (ш. Читтур)