[dropcap]М[/dropcap]айрал 31-нний «Дагестан» РИА-лий хьунни НТВ каналданул «Ты супер!» проектрал финалданийн бувксса Дагъус­ттаннаясса Эльвира ЯхIияеващалсса пресс-конференция.

[dropcap]Б[/dropcap]алай учаврилмур усттаршиву магьир дуллай, оьрмулул 13 шинавусса Эльвира дуклай бур шагьрулул 6-мур музыкалул школалий. «Ты супер!» конкурсрая ванин кIул хьуну бур ларгсса шинал му конкурсрай жулла республикалия гьуртту хьусса Карина Исмяиловайхчин.

— Ттул педагог Гульнара Багьауттиновал дуллуну дия му конкурсрайнсса заявка, на му иширах бакIрайра личIисса къулагъасрагу къадурссия. ЧIун ларгун, му заявка кьамул дуршиву кIул шайхту, байбивхьуссару жу сукку-кьютIу тIий, аваралий мунийн хIадур хъанай, — буслай бур Эльвира.
МахIачкъалаллал 30-мур лицейрал дуклаки душнил му проектрай хьуну дур дачIи шин. Му хIаллай ванил хьуну бур цIусса чIявусса дустал. Дагъусттаннайн бувкIун махъгу миннащал дахIаву дуну бур, кувнначIан кувннал чичлай, оьвтIий.

[dropcap]В[/dropcap]атандалий Эльвира хьунабавкьунни лахъа-хъунну, Ма­хIачкъала шагьрулул администрациялул, Культуралул министерствалул ва цаймигу идарар­ттал вакилтурая, ванил цила гъан-маччаная, дустурая сакин хьусса хъунмасса делегациялул.
— На махIаттал хьунна, нава хьунабакьин аэропортрайн чIявусса инсантал бувкIсса ккавккун. Ххаришиврул цал архIал аьтIий ва хъяй буссияв, — буслай бур ва.

[dropcap]Э[/dropcap]львира бур рутIуллал миллатраясса душ ва ванин цинияргу ххирар цила миллатрал мазрай­сса балайрду щаллу буллан. Проектрая зана хьуну махъ ва цалсса ттигу бивну бакъар цилла райондалийн, миккурив ваних ссавур дакъа ялугьлай бусса бур.
Школалий 9 классгу къуртал бувну, Эльвирал хиял бур Москавлив Гнесинхъал цIанийсса Аьрасатнал музыкалул академиялувун дуклан буххансса.

Асия КьурбанмахIаммадова