ХIакьину Гъумучиял оьрчIал магьирлугърал школалийн занай бур 200-ннийн бивсса оьрчIру.
Гъумучиял Оьр­чIал магьирлугърал школалул шинал хIасиллу дуллали­сса ххаллилсса концерт хьунни ттигъанну Гъумучиял клубраву.

Зулайхат Тахакьаева
Концерт дайдишин хьхьичI школалул директор МахIаммад Хъунбуттаевлул бувсуна шинал лажиндарай республикалул конкурсирдай ва фестиваллай оьрчIал ккаккан дур­сса хьхьичIуннайшивурттая. ОьрчIан ва дарс дихьултран буллуна дипломру. Шинал дянив кьуния арулва диплом хьуну бия республикалул лагрулийсса. Ми лавсун бур къавтIалтрал, халкьуннал инструментирттай руцултрал, балайчитурал, канил сянатчитурал.

Жула чIава гьунардучитурал цIа республикалул лагрулий хьхьичIунсса ххуттай душиву щала райондалул тIайлабацIур. Дайдирхьуна концерт Лакрал гимнрайну. Цуксса къаххуйри, залдануву щябивкIмигу лавай бивзун, оьрчIащал Лакрал гимн учаву. Авадансса ва яргсса дия щалла программа: «Гъази-Гъумучи» балайлул ва къавтIаврил ансамбльданул лакку балайрду ва къавтIавуртту, халкьуннал инструментирттай руцаву. Ххи хьуну дур школалий уттинин къадиркIсса театрал кружокгу. Ккаккан бувна МухIуттин Чариновлул «ХIабибат ва ХIажияв» спектакльданувасса бутIа ва оьрус­нал магьлул инсценировка.

Къуртал дурна концерт Шагьимардан Акниевлул мукъурттий­сса ва макьандалийсса «Абадул абад къахьуннав дяъви» тIисса балайлийну. Ца ххирассияча ттун ва балай. Нава чIивисса заманнай мудан радиолувух баяй­ссия. Хорданущал ва балай учин увккуна цува МахIаммад Хъунбуттаевгу, тIий бия залдануву щябивкIмигу. Гьай-гьай, Ла­ккуй магьирлугърал школарттал хьхьичIунсса мураднугу бикIан багьлай бухьунссар ппухълунная бивсса халкьуннал ххазина ябаву.