Хъус духхай машинарттансса низам

[dropcap]И[/dropcap]юньдалул 6-нний ДР-лул ХIуку­матрал Председатель Артем Здуновлул дунни къатри дайни лув лирчIмур (твердые бытовые отходы) дукьан даврил ва хъус духхай машинартту МахIачкъалалийх заназаву низамрайн дуцаврил хIакъиравусса батIаву.


«Махъсса ппурттуву жу дарду МахIач­къалаливсса тагьарданул мониторинг, чIявусса ливчIунни щаллу бан къавхьу­сса масъалартту, система чан-кьансса низамрайн дуцирчагу. ЧIалай бур жаваб­лувсса команда зий душиву. БувчIлай бур гужгу, арцугу диял хъанай дакъашиву. Жу пикри банну шагьрулул бюджет­ран цукун кумаг бан бурив. Амма бур низамрайн багьайссагу масъалартту.

Жува буру шагьру лакьлай, марцI буллай, амма шагьрулувун духлай дур хъус духхай техника, цукунчIавсса контрольгу бакъана, шагьру чапал буллай бур. Ттул пикрилий, шагьрулувун хъус духхай машинар­тту буххан битаврил низам цIакь дан аьркинссар, балжисса инсаннал дулун аьркинссар мунил жавабгу. Жува аьркин­ссар мунил хьхьичIалу кьукьин», — увкунни ХIукуматрал председательнал.

Мунал бувсунни мукунма гъинттул чIумал къатри дуллай, кьянкьасса лур лирчIмур, лах-ххит гьарза хъанай бушиву, миккугу низам дишин аьркиншиву.
Шагьру ччюрк-цIинцIлицIа марцI баврил хIакъираву ихтилат бунни Ма­хIачкъалаллал мэрнал кIанайма Абуссупиян ХIасановлул. Мунал бусаврийну, гьарца кьини шагьрулия дуккан дуллай бур «Горзеленхозрал» сайки 600 тонна цIинцIлил, цIанасса ппурттуву контейнерду биялну бакъар. ЦIана шагьрулий дузал буллай бур шагьру цIинцIлицIа марцI байсса цIусса идара.

БатIаврий хIукму хьунни июньдалул 15-нния шинмай хъус духхай машинартту шагьрулийн буххан битлан так спецпропускирттайну. Му бакъассагу, ялув бацIаву гужлан дантIиссар ГИБДД-лул чулухатугу.