Наниссару лагерьдайн

ОьрчIру гъинттул бигьалагаврил гьашинусса сезон дайдирхьунни «Бургъил зума» тIисса лагерьданул. Ва республикалий ца яла ххуймурди. Июнь зурул 6-нний МахIачкъалаллал школардай дуклакисса 100 оьрчI кьамул увссар ва лагерьданул.


П. Рамазанова
ОьрчIру лагерьданийн тIайла бувккунни шадлугърай, Е. Исинбаевал цIанийсса стадиондалия. Нитти-буттахъащал архIал оьрчIру тIайла буккан бувкIун бия шагьрулул администрациялул вакилталгу.
ОьрчIру лагерьдайн биян буллалиссар «Дагтранс» компаниялул автобусирттай ва мюрщи автобусирттай. Биян баву – буцаву тапшур дурссар опыт бусса водительтурайн.
Дуклаки оьрчIащал лагерьдайн наниссар ва давринма хIадур був­сса учительтал, Минздраврал тIайла бувксса медициналул зузалт.

Ца смена 21 гьантлийссар. ОьрчIру ххуйну бигьалагаву мурад­рай хIадур дурну дуссар ххуйсса программа: конкурсру, викторинарду, музыкалул байранну, спортрал тIуркIурду, машгьурсса инсантуращалсса хьунабакьавуртту.
Лагерьданийсса бигьалагаву украссар. Гьарцагу оьрчI лагерьданийн тIайла укканнин хIакинтурал ххал увссар, тIалавшиннагу мукунссар. «Гьар шинах республикалул лагерьдай бигьалагайссар кIиазарунниха ливчусса оьрчIру, гьашину шаназара оьрчI игьалаган тIайла уккан ниятрай буру. ХьхьичI ирглий, жу тIайла бу­ккару ятинсса, ахIвал кIюласса кулпатирттавасса ва дуккавриву, спортраву ва цаймигу иширттаву хьхьичIунми оьрчIру», — тIий ур оьрчIахь ххуллухъин учин увкIсса шагьрулул КIулшиву дулаврил управлениялул хъунама ТIагьир Мансуров.

Ва цалчинсса сменалий «Бургъил зума» лагерьданий игьалагантIий ур 250 дуклаки оьрчI.
Путевкарду дулайссар МФЦ-дай.
ОьрчIру лагерьдайн бигьалаган тIайла букканшиврул тIалав буллалисса документирттал сияхI дур Республикалул Элмулул ва кIулшиву дулаврил министерствалул сайтрай, «гъинттулсса бигьалагаву» тIисса разделданий.