Ватан ххирашиврул байран

[dropcap]И[/dropcap]юньданул 12-нний ДР-лул ХIукуматрал Председательнал 1-ма хъиривчу Анатолий Карибов гьуртту хьунни Аьрасатнал Кьинилун хасну дурсса шадлугъирттай.

Хъуншагьрулул хъунмур майданнив бувкIун бия волонтертал, школардай ва вузирдаву дуклакисса оьрчI-душру, жяматий­сса идарарттал вакилтал. Миннал 1-ма вице-премьернащал цачIу лавсун бавчунни билаятрал паччахIлугърал хъунмасса ттугъ. Яла Лениннул цIанийсса майдандалия дайдирхьунни «Аьрасатнал агьалинал дусшиврул парад», му къуртал хьунни Оьруснал драмалул театрданучIа. Микку хьунни Аьрасатнал Кьинилун хас дур­сса ххаллилсса концерт.

Байран тIитIлай, МахIачкъа­лаллал бакIчинал кIанайма Абу­ссупиян ХIасановлул увкунни: «Жулла республикалун Аьра­сатнал Кьинилул ляличIисса мяъна дуссар. Шикку ттуршрахъул шиннардий дусшиврий ялапар хъанай бур ацIвахъул миллатру, му жулла аваданшивур, никирая никирайн нани­сса», — увкунни мунал.

Яла дайдирхьунни концерт. Муний гьуртту хьунни оьрчIал искусствалул школарттал коллективру, оьрчIал филармониялул ва Дагъусттаннал эстрадалул балайчитал.