ДакI ххари шай, пахру багьай жула дагъусттанчуная ххуйсса хавар баяйхту. Вана, уттигъанну ЦIущарниясса, Гьамиящиял ветеринар участокрай гъаттарал хIакинну зузисса МахIаммадов АьбдулвагьидлучIан ва ванал кулпат НатальячIан бувкIунни Рязань шагьрулий аьралуннаву къуллугъ буллалисса вайннал арсная КьурбанмахIаммадлуя рязину бушаврил чагъар.
КьурбанмахIаммад къуллугъ буллай усса ур муххал ххуллул батальондалул 98534-мур аьралий частьрай.
— ЖучIа къуллугъ буллалиссаксса мутталий зул арснал ккаккан бунни цува дакI тIайласса, захIмат буван ххирасса аьраличу ушиву. Ванал ялун личин буллай ур цала бюхъу, кIулшиврул гьунар, — тIий чичлай ур чагъарданий частьрал командир С. Кузнецов.
КьурбанмахIаммадлул МахIачкъалалив Ххуллурдал машинарттал университет къуртал бувну бур 2017-ку шинал. Ссуттихунай лавгун ур аьралий бурж лахъан. Жувагу чIа учинну зунттал чувнан цIуллушиву ва тIайлабацIу. ДакI ххарину зана хьуннав нитти-буттачIан!
Арсен Аьбдуллаев