[dropcap]Б[/dropcap]игьарив яхъанан ва лакрал улклуй Чарттаву хъу дугьлай, чарттаву цулуй? Шикку лайкьсса куццуй оьрму дуз буван Чарияр кьянкьа хьун аьркинссар чувнан.

Ахъушиял райондалийсса лакрал щархъавасса ца лакрал ва даргиял дазуцIухсса ЦIуликъяннал шяравалу дур. КIа цурда дусса кIанугу райондалий ца яла лахъмур бур. Шяраваллил тарих аьвзалзаманная шихунмай нанисса тарих бур. ПаччахIнал заманнай цIарай битайсса ттупангру – нувчIабихьулт ишла буллали­сса чIумал, ЦIуликъяннал шяраву нувчIа буккайсса бивкIун бур, мунияту дирзхьунссар ЦIа­лякъи тIисса цIагу тIун бикIай. ЦIуликъяннал ва даргиял Щукьтти тIисса щархъал ца колхоз диркIун дур. ЦIанагу кIирагу шяраваллил цачIусса администрация бур.

---

Андриана Аьбдуллаева
Гьарица шяраву икIай жямат­ран акъа чара бакъасса, гьармунил бакIцIуцIаву дуллалисса, ля­личIинува цинявннан бусрав­сса ца-ца инсан.
Ттун бусан ччива, лагма­сса шяраваллал агьулданун акъассагу, щалагу Ахъушиял райондалийгу бусравну ивкI­сса,аьпалул хьуну махъгу цал цIа кIулциривннал хIурматрай зумух ласайсса ЦIуликъяннал КьурбанмахIаммадов Динма­хIам­мад­луя.
Кьуния ххюра шинай цала кулпатращал Щукьттиял шяраву ялапар хъанай,ва шяраваллил жяматрачIа ххишала­сса хIурматран лайкь хьуну ур ДинмахIаммад. Ахъушиял райондалий ца яла хьхьичIунсса зузалан ккаллину ивкIун ур. Колхозру лирну махъ ДинмахIаммад буттал шяравун ЦIуликъянив ивзун ур.

[dropcap]Ш[/dropcap]яраваллил советрал председательну зузисса чIумал, кIирагу шяраву низам цIакь дан школарду, медпунктру,клубру ва цаймигу идарартту цIу дуккан бан хъунмасса захIмат бивхьуну бур ДинмахIаммадлул. Ванал каялувшиндаралу шяравун бувцуну бур ток, цIу буккан бувну бур щинал бургъурду, цIусса мурхьру бувгьуну, цIунил ляду­ккан дурну дур хIатталлил ялув­сса хIалу,ванал хIарачатрайну тIивтIуну бур шяраву школа, сакин бувну бур кIирагу шяраваллин цанмалусса советру.

[dropcap]Ш[/dropcap]яраву бакъахьунссар цавагу кулпат ванал ка-кумаг къабувсса, чIарав къаавцIусса. ХIа­сил, шяраваллил жямат­ран ка къаччуччин къяцIа кунасса чув-адимина ивкIун ур ДинмахIаммад. Ванал чIявуну учайссия тIар: «Чув-адамина, чару куна, кьянкьасса икIан аьркинссар, гьарца ишираву адиминашиву дуруччин кIулну бикIан аьркинссар»,-куну. Ванал занакьулушин, увку­сса махъ цайминнавун яхI бутан­сса бивкIшиву тасттикь буллай бур ва кIулми.

Ца ппурттуву, Анжилив къат­ри дуллалисса арснан кумаг буллай,кьай духхай машиналия хIаятраву дишинсса плитартту ли­ккан дуллай ивкIун ур угьара хьусса ДинмахIаммад. Тинай авцIусса жагьилсса шупирнал, цала нач ххиен дан кунма, ДинмахIаммадлухь увкуну бур: «Ина, хъунасса адимина, мазрача, жагьилминнал цала дучIан дан рити», — куну. «Валлагьий, ттун азгъинсса чув чIаххуврайвагу къаччиссар, — увкуну бур ДинмахIаммадлулгу. Му яхI бивзун гассят щупиргу айивхьуну ур кумаг буллай. ДинмахIаммадлуя бивзмигу буттал къириятрал нас­лу бур.

[dropcap]Н[/dropcap]а мудангу махIаттал хъанан бикIара ва икрамрай бикIара та бигьа бакъасса заманнай захI­матсса хъу-лухччинул давурттугу дуллай,жяматрал давурттал хъаргу лархъун,чIявусса оьрчIругу ччаннай бацIан бан бювхъу­сса жула нитти- буттай. Ларайсса кIулшивуртту ларсъсса бакъанугу ,оьрмулул ­аькьил бувсса ххаллилсса тарбиячитал бивкIун бур.
-Жу ххюва оьрчI бияв,шама уссу ва кIива ссу. Буттан ччай бия жу дуккин бан,халкьуннавун буккан бан,оьрмулуву занакьулу бикIан лахьхьин бан.Байбихьулул классир­ттаву дуклакисса чIумал, каникуллай бу­ттал кIийла гьан увнав на Щурагьун пионертурал лагерьданийн оьрус маз лахьхьиншиврул, арулчинмур классраву гьан увнав Къизлярдайсса интернатравун. Дахьа шярава кьатIув увксса ттун, цин лар­хьхьусса захIматшивуртту хьунадакьирчагу, ми шинну ххуй­сса тарбиялул ва кIулшивурттал школану хьуна,-тIий, буслай ур ДинмахIаммадлул хъунама арс, республикалий ххуйну кIулсса аьлимчу Кьурбан КьурбанмахIаммадов. ДинмахIаммадлул бивхьу­сса захIмат дузрайн бувкшиву чIалай бур, ванал оьрчIал хьхьичIуннайшивурттах бурувгунгу.

Школа къуртал бувну махъ Кьурбан увххун ур Рязаннайсса радиотехникалул институтравун,институтгу ванал лавайсса кьиматирттай къуртал бувну бур.Шиккува бусан,цал Кьурбан каникуллай шавайн увкIсса чIумал,вайнначIа ивкIун ур Москавлиясса хъамаличу. Та диркIун дур Дагъусттаннай аьрщи сукку хьу­сса 1973 шин.Бивсса зарал ххал бан шяраваллавун Москавлия коми­ссия бувкIун бивкIун бур.Кьурбаннухь цIухху-бусу буллали­сса къуллугъчи махIаттал хьуну ивкIун ур ва архсса зунттал шярава­сса оьрчI та захIматсса институтравун цукун увхссар тIий. Бу­ттал мюрщину бунува оьрчIавун дуккаврихсса гъира бувтун бур.Кьурбаннул чIивима уссугу Киеврай институт къуртал бувсса хьхьичIунсса пишакар ивкIун ур,апатI хьуну ччяни дунияллия лавгун ур. Вама уссу Анжилив ялапар хъанай ур, ишбажаранчи ур.Ссухълугу цала-цала кулпатру бувну бур.

-Ца чIумал буттал увкуна ттухь: «Ина ттул хIурмат бара,на рязину ура вияту,цамур куццуйгу мабувчIара,ми вила оьрчIан ттуяту винна нигь душиву кка­ккан бува», — куну. Утти хъиннува бувчIлай бур ттун буттал аькьил­шиву, мунал мукъурттил куртIшиву, — тIий ур Кьурбан.
ХIакьину оьрмулул хъуниминная чIявуну баллан би­кIай жагьилминная рязи бакъа­сса, ай, захIмат бан ччисса ба­къар, ял­ттутувасса бур тIисса цIуру-кIуру. Ттун цIуххин ччива, ми жува ба­къарив тарбия буллалисса, буссарув жува, хъуними, миннан эбратну сукку тIутIисса? На мукIрура, чIа­ваминнал хъуниминная эбрат ласайшиврийн,ххаллилсса ни­тти-буттахъаягу, ДинмахIам­мадлуя ва Хадижатлуя кунма лайкьсса наслу бизайшиврийн. Ванал бур ххюва оьрчI, урчIа оьрчIал оьрчI,минналгу микссава оьрчIру.Цинявгу бур ттаттал, хъунаттаттал цIа лайкьну дуручлачисса.
.