МахIачкъала шагьрулул тарихрал музейраву хьунни «Жуллаг. Бархъаллал нигьру» тIисса бархъаллал тIахIунттан ва тIахIунтту дувултран хас дурсса суратирттал ккаккия.
Ккаккиялий дирхьуну дия ларгмур ттуршукулул ва ттизаманнул цIанихсса фотохудожниктурал – Рудольф Диклул, Федор Зимбеллул, Сергей Тартаковскийл, Камил Чутуевлул суратру ва цIанихсса художник ва заргал Манаба МахIаммадовал канил давуртту ва цаймигу – ХХ-мур ттуршукулул дязанния хIакьинусса кьинилийн дияннинсса сайки ттуршуннийн дирсса давуртту. Вай давурттал ца бутIа музейрдан пишкаш бувну бусса бур цала автортурал.
Музейрал директор Зарема Дадаевал бувсунни ккаккия сакин дуршиву тамашачитал бархъаллал тIахIунтту дувултращал кIул баншиврул. «Ва ккаккия – синааьрщарава кару къадуклай, захIматран къалавхьхьуну багьлул кьюркьусса давриха зузисса хъаннин бивщусса кьиматри.
Фотохудожниктурал суратирттай ккаккан бувну бур синааьрщарал касакрая эмаратсса къукъу-къюнари байсса куц. ЛухIи-кIяласса суратирттал тIурча, буслай бур бархъаллал тIахIунтту даврил магьирлугъ тIутIайх дирчуну диркIсса чIумуя», – увкунни Зарема Дадаевал.
Искусствовед Татьяна Петенинал кIицI лавгунни Дагъусттаннай чIярусса душиву аслийсса сянатирттаха зузисса шяраваллу, амма, бархъаллал тIахIунтту кунма, художниктурал итталугу дуну, цала творчествалуву агьамсса кIану бугьлагьисса цамур дакъашиву. «Щалагу дунияллийх дурккун дур Бархъаллал тIахIунттал цIа. Жунма ххан бикIай бархъаллал тIахIунттая жунма цимурца кIулсса, амма ва ккаккиялийгума исват хьунни ва сянатрая жунма кIулну бушиву хъинну чансса», – увкунни ванил.
Фотовыставка «Жюллаг. Круги Балхара» лахъи лагантIий дур сентябрь зурул 7-ннин.
Ххадижат Ибрагьимова
