«НТВ» телеканалданий ккаккан дуллалисса «Ты супер!» цIанилусса дунияллул халкьуннал дянивсса балай учаврил конкурсрал финал хьунни уттигъанну. Муний, тамашачитурал буллусса чIурду хIисавравун лавсун, мукьилчинсса кIану бувгьунни МахIачкъалалиясса Эльвира ЯхIияевал.
Бадрижамал Аьлиева
[dropcap]О[/dropcap]ьрмулул 13 шинавусса душнил ххюва барзри ва конкурсрай гьуртту хъанай, биялаятрал гьунар бусса цайми оьрчIавух, цуппагу хьхьичIунсса кIанттун лайкьшиву чIалачIи буллай. Ва чIумул мутталий 82 гьурттучинава проектрал финалданийн увккун ия увагу 10, миннавух – Эльвирагу.
[dropcap]В[/dropcap]ай зурдардил дянив чIава балайчитал касмулул кьюлтIшивуртту, хасшивуртту лахьлай бивкIссар вокалданул язисса педагогтурачIа, оьрчIал чIарав бацIан, даврил опыт миннащалгу кIибачIин проектрайн бувкIссар жулва билаятрал эстрадалул 30-нния ливчусса машгьурсса балайчитал.
Вай гьантрай хьусса финалданийгу цинявппагу гьурттучитурал цалва-цалва номерду щаллу бунни билаятрал хьхьичIунсса балайчитуращалсса дуэтирттай. Эльвирал балай увкунни Аьрасатнал халкьуннал артистка Валериящал.
[dropcap]К[/dropcap]онкурсрал концерт къуртал хьуну махъ цинявппагу гьурттучитал лайкь хьунни хасъсса бахшиширттан. Балугъравун бухханнинцIакул вай цинявппагу оьрчIан буллантIиссар хасну сакин дурсса «Ты супер!» цIанилусса фондравасса стипендия. Ва шинал августрай «Артек» лагерданий хьунтIисса хъуннасса концертравухгу гьуртту хьунтIиссар вай.
Эльвирал цIарив, щак бакъа, жунна централ каналлая ттигу цимилгу баянтIиссар.
