«Аьрасатнал чул бищай кIану» («Опора России») тIисса чIи­вимур ва дянивмур бизнесран кабакьу буллалисса Аьрасатнал жяматийсса су­ккушиндарал гьану бивзун бур 2002 шинал.

А. Аьбдуллаева
ХIакьинусса кьини шивун бухлай бур 450 азаруннийн бивсса ишбажаранчитал ва цайми инсантал, ванил цачIун дуллай бур 100-нния ливчусса отраслилул союзру, ассоциацияртту ва гильдияртту.

Организациялул отделенияртту зий дур АьФ-лул 85 региондалий, миннувух — Дагъусттаннайгу. Уттигъанну Дагъус­ттаннайсса отделениялул ишбажаранчишиврухун багьсса хъаннил хъунмур, хьхьичIунсса ишбажаранчи Зульгимар Тагибова-Ричинскаял каялувшиндаралу МахIачкъалалив «Белона» ттучандалуву хьунни ишбажаранчишиву дуллали­сса хъаннил батIаву.

Шикку бия ишбажаранчишиврул ххуллийн нукIува бувксса, опыт бусса, Москавлив, МахIачкъалалив ва цайми шагьрурдай цала салонну, ттучанну бусса хъами ва дахьва бизнесрахун багьми. БатIаврил мурад бия ккурандалувуми кувннащал кув кIул баву, аьмсса масъаларттая ихтилат баву ва дахьва ишбажаранчишиврул ххуллийн буклакиминнан чIарав бацIаву, кабакьу баву. Ккурандалул девизгу укуннасса дур: «Кумаг бува, хъанай бухьурча», — тIисса.

Ккурандалул уттиния тихуннай дуллансса давурттавух кIицI ларгунни хIукуматрал къуллугъчитуращалсса, хIатта республикалул бакIчинащалсса, хьунабакьаву.
«Аьрасатнал чул бищай кIану» хIа­кьину ялу-ялун сий гьаз хъанахъисса, бучIантIимур бусса суккушинна дур.
Дагъусттаннай чIивимур ва дянивмур бизнес хъинну ишлану духьувкун, ва су­ккушиннарая жунмагу хъунмасса мюнпат хьунссия.