ЦIанихсса палангнал драматург Ж. Мольердул «Кьякьлухун ивхьусса лас» тIисса пьесалувасса ва калима оьрмулуву ишла дуллай бур, цала бакIрачIан бувкIсса балардал тахсирлув инсан цувари тIисса мяъналий.
Зулайхат Тахакьаева
[dropcap]Л[/dropcap]аргсса хамискьини А. Къапиевлул цIанийсса драмалул ва музыкалул театрданул сахIналий хъунмасса тIайлабацIулущал хьунни палангнал машгьурсса драматург ва актер Ж. Мольердул пьесалийсса «Жорж Данден» ягу «Кьякьлухун ивхьусса лас» тIисса спектакльданул премьера.
Режиссер-постановщик – Дагъусттаннал халкьуннал артист Аслан МахIаммадов. Художник-постановщик – Дагъусттаннал лайкь хьусса художник Аскар Аскаров.
Жорж Данденнун (Аслан МахIаммадов), авадансса, амма щилчIав итталу акъасса хъудугьун, ччан бивкIунни дворяннал титул ласун, «господин де ла Дандиньер» хьун. Му ниятрай, цанма щарну, цала цIа-кьинилун лавхьхьусса, дакI хъинсса марцIсса душ къабувцуну, буцлай ур барон де Сотанвиллул душ, аьнтIикIа Анжелика (Зинаида Чавтараева). ДумуницIа хьусса дворянтурангу ва ташулуву къулайшиву чIалай, душнихлу хъунмасса багьагу лавсун, рязи шай. Данденнул бакIрайн тIурча, балардал гъарал ларчIунни. Уздантурал тайпалиясса нину-ппу господин Сотанвил (Шамсуттин Къапланов) ва госпожа Сотанвил (Саният Рамазанова) бур куяв цала цIанингу, душнингу лайкьсса акъашиву иттах бишлайнма. МуницIуна ялун ливчунни ганал муттаэгу – бакI-чурххал оьвхъусса виконт Клитандр (Ислам МахIаммадов).
Гьарцагу хъярчийсса спектакльдануву кунма, ва къямадиялувугу хъяхъавривух аьтIаву хIала духлай дур. Спектакль наниссаксса хIаллай хъяй бивкIхьурчагу, ахирданий тамашачи аьраттал уклай ур. Щарссанил хъяврин уллай, ганил нину-ппугу душнийн вих хъанай, ахиргу Жорж Данден личIлай ур авлияшиврухун ивхьуну.
«Муяв вин ччисса, Жорж Данден» тIий, къуртал хъанай бур спектакль. Ва калима оьрмулуву ишла дуллай бур, цала бакIрачIан бувкIсса балардал тахсир инсан цувари тIисса мяъналий.
Спектакльдануву ялагу роллу дургьуну бия: Рукьижат МахIаммадова (Анжеликал хьхьичIазала); Ямлихан ХIажиев (Клитандрдул ичIувасса хъудугьу); Хидирнаби МахIаммадов (Жорж Данденнул хьхьичIазала). Ххаллилъя актертурал тIуркIу.
