Укку машай, духьурча мяш учинсса хъус

[dropcap]К[/dropcap]Iира кьини нантIисса ва мероприятиялий цалла хъус тамашалун дишинтIиссар жулла региондалий хьхьичIунсса предприятиярттал ва организациярттал.

З. АьбдурахIманова
[dropcap]В[/dropcap]ыставка тIитIлатIисса шадлугърай гьуртту хьун увкIун ия ДР-лул Ишбажаранчишиврул ва инвестициярттал агентствалул хъунама Башир МахIаммадов, «Дагестан-ЭКСПО» центрданул каялувчи МахIаммад Саругъланов, МахIачкъалаллал бизнес-сообществалул хъунама АьбдулхIаким Пахруттинов.

ХьхьичI кьини «Дагестанская правда» кказитрай хьусса пресс-конференциялий МахIаммад Саругълановлул бувсуна выставкалул агьаммур мурад жула ишбажаранчитурал даража ккаккан бансса, миннал итадакьлакьисса хъус региондалул кьатIувгу машай дуккан дансса бушиву.

«Жун ччай бур ва выставка сававну жулла республикалул маэшатравун инвестицияртту дуркIун, жула ишбажаранчитуращал вихшаласса дахIавуртту, кьутIирду цIакь дурну, конкуренция духIан шай­сса хъус итадакьлансса шартIру дузал хьуну», — кIицI бувна М. Саругълановлул.

Выставкалул цалчинмур кьинигу Р. ХIамзатовлул цIанийсса хъун библиотекалул майданнив унгу-унгуну щуруй бия «Завод им. Гаджиева» ОАО-лул, «Ростелеком» ПАО-лул, «МФЦ Дагестана» ГАУ-лул ва цаймигу предприятиярттал павильонну. Бия шикку банкирдал, медициналул, шяраваллил хозяйствалул, печатьрал идарарттал, строительствалул ва цаймигу арарду тамашалун дирхьусса мурцIурду. Аьмну выставкалий гьурттуну дия зувинничIан дирсса предприятияртту.

Хъус ккаккан дуллалисса бутIа бакъасса, выставкалул лагрулий хьуссар личIи-личIисса проектирдал презентацияртту, ккуркки столлу ва ишбажаранчитурансса мастер-классру.