[dropcap]Ц[/dropcap]а ххирархха ттун ляличIину лухIи-кIяласса суратирттай тамаша буллан, гъирарай гайннуйсса гьарнал кьадардал хъирив лаллан ва цуманал бакIрачIан ци бувкIун бурив цIухлан.
Хъахъи-мачIа ларгсса суратирттал жула дакIурдиву тIааьнсса, гъилисса асарду хIасул бувай. Щукру пишагу ттула ва гъирарацIун бавхIусса бусса. ТIааьнну бия сайки 60-хъайсса шинну хьусса ва суратрал тарихрая бусласисса, жуна чIявучин кIулсса ва хIурматрайсса Ссапарбаг Аьбдуллаевлул дакIнийн бичавурттахгу вичIи дишин. Бюхъайхха, суратрайсса лахьхьусса вай душ-оьрчIавух жул хIакьинусса буккултгу бикIан, ягу вайннал гъан-маччанан дакIнийн багьан.
Залму АьбдурахIманова
ВичIи дишинну цахра Ссапарбаглух:
— Уттигъанну, жула цIа ларгсса Гъумучиял школалуцIун дархIусса цаппара мероприятияртту сававну, ттула суратирттал архив ххилтIу буллай унува, бакIрайн дагьунни нава Гъумучиял школалий 4-мур классраву дуклакисса чIумалсса ва сурат. Ванийсса ттула чIунархIал оьрчI-душваврал лажинтру, хасиятру дакIний лирчIнугу, вайннал цIардурив чIяруми ттун утти дакIний дакъар. Сурат цурдагу рирщуну дур школалул хIаятраву 1955-56 шинал.
Дянив щяивкIсса Гъумучиял школалул директор Ибрагьин Чалабовлул чIаравсса ва СалихIат (фамилия дакIний дакъар) тIисса учительница бур. Цилагу цумур дарс дишайсса диркIссарив цIана мяълумну дакIний бакъар. Хъинну бакIралгу авурсса, иминсса, чурххай цIу буну янна-усгу лаххайсса, бакIрайн мудан кIяла лачакгу руртун заназисса учительница бикIайва. Киямур чулух щяивкIсса Аьбдул Парамазовгу чIявучин кIулсса, жул хъинну ххуйсса учителъя. Вайннал махъ авцIусса Гъумучатусса Оьмари (ваналгу фамилия дакIний дакъар) физкультуралул дарс дишайсса учительгу, жул классрал каялувчигу ия: ца ччаннал мушакъатсса уну, мудан аьсавращал занай икIайва. Ччаннал сакъатсса ивкIнугу, жуву спортрахсса ччаву цIакь дуллай, спортзал бакъанугу, чув-дунугу хъанахъисса спортрал бяст-ччаллайн буцлай, жуй дакI аьтIисса учитель икIайва. Ялу-ялун учительшиву дуллан захIмат хъанай бухьунссия, махъ бавуна Оьмари Пятигорскалийн ивзун, тийх ссяткарну зий усса ур тIий.
Цаппара ттущала дуклай бивкIминнал цIарду дакIний дур, цаппарассанналгу – так фамилияртту. Мисалдаран, дакIний ур Исяев ХIамзат, Марзи, Раиса, Элеонора, ГьунчIукьатIатусса Дандамаева Гуля, Муккуриятусса цIа дурксса волейболист Оьмаров Нуруллагьлун щар хьусса.
Гъумучатусса Марзи тIисса душнил нину медсестрану зий дикIайва. Мукунма дакIний бур Элеонорагу, хъинну цIу буну янна лархсса, интеллигентсса нитти-буттал душ бикIайва.
ЦIургъуловхъаясса, Къапихъаясса оьрчIру ттущала дуклай бивкIсса дакIний бур. ВицIхъиял махIлалиясса цания ца шяравасса Касаевхъал тухумраясса оьрчIгу дакIний ур, цIарив дакIний дакъар. Басират тIисса душ бикIайссия дуклай, мугу яла махъ кIул хьуна ДР-лул Минсоцобеспечениялул министерствалий зий бивкIшиву. Таний Гъумук судьяну зий ивкIсса Багъировхъал тухумраясса оьрчIгу дакIний ур. Исяев ХIамзатлул ппугу финотделданул хъунаману зий икIайва. Сурхайхановхъул тIисса хъун тухумраясса душнил цIагу дакIний дакъар, щил бивкIссарив дакIний ливчIнугу.
Мукьилчинмур классгу къуртал бувну, на лавгссара Гъумучиял школалия. Цаппара хIаллай Аьшттарханнай дуклайгу ивкIун, махъунай гава школалийн зана хьусса чIумал, жул класс бавчIуну, личIи-личIисса классирттаву ккалай бия. Хъинну ххуйсса, учительтурал иттав бурувгсса, гайннал жухсса аякьа-ургъил дакIнихтуну дувайсса тIааьнсса шинну дикIайва. Суратрайсса цаппара ва дунияллия лавгунгу бур, аьпа баннав цал.
Ва суратрал тарихгу гьаз бав цIунилгу гьарнащал хьунаакьин ччисса умудрай, жулла оьрчIшиву, школа ва учительтал дакIнийн бичин ччишиврул…
Ххирасса буккулт! Ва суратрацIун бавхIуну, зунмагу ци-бунугу дакIнийн багьарча, бусанмур, ххи банмур загьир хьурча, чичара «Илчилийн». Жу му гъирарай аьлтту банну.
