[dropcap]М[/dropcap]айрал 19-нния 20-ннийнсса хьхьуну щалагу билаятрай хьунни «Музейрдал хьхьу» цIанилусса ирглийсса акция. Жулла республикалий му акциялувух гьуртту хьунни 6 азаруннийн ивсса инсан.
Бадрижамал Аьлиева
Шиная шинайн ва акция машгьур хъанай дур, ванил лагрулий дуллалисса давурттугу,мунивух гьуртту хъанахъисса инсанталгу цалнияр цал гьарза хъанай бур. Республикалул музейрдаву ва ххуллухгу хьунни хъинну чIярусса шадлугъру, выставкартту.
[dropcap]М[/dropcap]ахIачкъалаллал шагьрулул тарихрал музейрал ва Поэзиялул театрданул архIалсса проектрай дунни Дагъусттаннал цIа дурксса фотохудожник Камил Чутуевлул язими суратирттал выставка. Поэзиялул театрданувусса экспозициялий цачIун дурну дур махъсса 50 шинал дянив Камил Чутуевлул рирщусса суратирттавасса цаппара. Вай циняв дур лухIи-кIяласса. Выставка лахъи лагантIиссар июньдалул 12-нин.
П. ХIамзатовал цIанийсса Изобразительный искусствалул музейраву тIурча, тIивтIуну бия Дагъусттаннал шяраваллаву, аьдатирттал чулуха тIий, канил пишардал, балай-къавтIавурттал чулуха тIий, ца яла хIазмунин, аваданмунин ккаллисса Бархъаллал шяраваллин хас бувсса экспозиция. Миккун бувкIминнаща бюхълай бия ва шяраваллил усттартурал дирхьусса суратру ва каруннил дурсса чIюлушиннарду, яргсса янна-ка ххал дуван ва, гьай-гьайгу, цIа дурксса бархъаллал къавтIаврих буруган.
