[dropcap]Ц[/dropcap]Iуминалийсса цIуссалакрал агьалинал администрациялул къатрал чIаравсса майданнив лахъа-хъунну кIицI дунни Интнил ва захIматрал байран. Байрандалийн бувкIун бия шяраваллал агьлу ва цайми районнаясса бусравсса хъамал.
Му кьинилуцIун бавхIусса ихтилат бунни ЦIуссалакрал райондалул бакIчи МахIаммадхIажи Айдиевлул ва Райондалул депутатътурал мажлисрал председатель Мавлидин Исламаьлиевлул.
— ЗахIматрал кьимат жула халкьунначIа мудангу бивкIссар. Цала даву ххуйну кIулсса пишакартурал – учительтурал, хIакинтурал, строительтурал хIурмат мудангу бивкIссар. Жу дакIнихтуну барчаллагьрай буру жула райондалул экономика хьхьичIуннай дан, агьалинал багьу-бизулул даража гьаз бан захIмат бивхьусса ветерантурайн ва хIакьину личIи-личIисса арардаву зий ххуй-ххуйсса ккаккияртту чIалачIи дуллалиминнайн, — увкунни Мавлидин Исламаьлиевлул цала ихтилатраву.
Байрандалул сий хъиннура гьаз дунни культуралул управлениялул зузалтрал хIадур дурсса концертрал. Цала-цала программардащал бувкIун бия цIуминалийсса цинявппагу школарттал дуклаки оьрчIругу. Байрандалийн бувкIминнан хъинну асар хьунни ляличIисса чIу бусса,
Мурад Къажлаевлул цIанийсса итххявхсса оьрчIансса искусствалул школалул дуклаки оьрчI Даниял Шабановлул увкусса балай. Концертрал программа дакъассагу, хьунни райондалул администрациялул чулухасса бахшишру дуллалисса спортрал бяст-ччаллугу. Ми хIадур бувну бия физкультуралул ва спортрал комитетрал пишакар Анзор Абакаровлул ва райондалул оьрчIал ва жагьилтурал спортрал школалул.
Ва кьини, цинявппагу хъамал кьамул буллай, майданнив тIивтIуну бия лакку дукрардал авадансса ссупра. Низамрал къаралданий личIлулну бавцIуну бия ЦIуссалакрал ОМВД-лул зузалт.
Андриана Аьбдуллаева
