Луттирдал караматсса дуниял

ПахIачкъала шагьрулул ЦБС-рал (Центральная библиотечная сеть) №20-мур библиотекалул хъунмурну зузисса Ваччиял шяравасса Роза Къапиеващал. Ттун бикIай библиотекалуву дазу-зума дакъа луттирдуххирасса инсаннан бакъа зун къабучIисса ва къабюхъайсса кунма бизлай. Мукун бугу-бухьунссар.
Андриана Аьбдуллаева
— ОьрчIнийва ххирассия луттирду ккалан. Хиял бикIайва дунияллий буцири луттирду буккинсса. Мунияту 1979 шинал, Къизилюртуллал №5 школалий 10 класс къуртал байхту, поселокрал библиотекалуву зун лавгссара, мура шинал МахIачкъалалив культпросветучилищалувунгу бувххун, — тIий, байбивхьунни цила ихтилат Розал.

Луттирдахсса ччаврил бувцуну бур Роза гихунмайсса ххуллийхгу, Культпросветучилищагу ЯтIул дипломрай къуртал бувну, 1982 шинал ва бувххун бур Дагъусттаннал университетрал филологиялул факультетрал библиотекалул отделениялийн. Му къуртал бувну махъ шанна шинай зий бивкIун бур Къизилюртуллал ЦБС-рай методистну. 1988 шинал зун бивкIун бур МахIачкъалаллал ЦБС-рал №20 биб­лиотекалий, цал библиотекарьну, 1997 шиная байбивхьуну – библиотекалул хъунмурну. Зувира шин дурну дур Розал ва ца кIанай зий. ЦIана луттирдахсса гъира хьхьичIва кунмасса бакъахьурчагу, буккулт ванил библиотекалуву тачIав чан къашай. Мигу чIявуми шиккун гъансса 17-мур, 27-мур школардал дуклаки оьрчIру бур.
— Махъсса ппурттуву оьрчIащал библиотекалувун бувкIсса нитти-буттахъавун цавунмагу гъира багьну, миннаягу хьунни жул буккулт. ХьхьичIва хъуниминнава кIия-шама инсан учIайсса ивкIхьурча, утти ми мадара ххишала хьунни, — тяхъану буслай бур Роза.

Мяйжаннугу, библиотекалувун увхсса цаягу инсан луттирдах гъира къабагьну къауккайхьунссар шива. Библиотекалуву ца аьжаивсса хIикматшиву, караматсса асарду бикIай.
Шивун бувкIсса буккултращал, хъунмурчIин дуклаки оьрчIащал, зузаву бакъассагу, библиотекалул зузалтрал оьрчIал садикирттайгу дуллай бур личIи-личIисса мероприятияртту оьрчIавун мюрщину буна луттирдах гъира бутаву мурадрай.. Ва библиотекалул аякьалийн лавсун бур №68, №69 садикру.
Уттигъанну 17-мур гимназиялул дуклаки оьрчIащал шикку хьунни Кулпатрал кьинилун хас дурсса «Кулпат цIакьну бухьурча, державагу цIакьссар» тIисса литературалул мероприятие. ОьрчIахь бувсунни кулпатрал кьинилул тарихрая. ОьрчIалгу бувсунни кулпатрал хIакъиравусса цала-цала пикрирду, дурккунни С. Есениннул, Э. Асадовлул, Е. Евтушенкол, М. Цветаевал назмурду. Мероприятиялул лагрулий хьунни «Гьула, бувчIа» тIисса конкурс. Вайва гьантрай биб­лиотекалуву хьунни цаймигу ххаллилсса мероприятияртту.
Луттирду шаппа буккин ласун ччисса бухьурча, шаппайнгу буллай бур кIира нюжмардийсса. Лу бу­ккай залдануву аьркинсса лу бакъахьурча, му компьютерданува буккан буллай бур.

Библиотекалий 3 инсан зий ур – каялувчи ва кIия библиотекарь.
Библиотекалул зузалтрал цIу­­ру-кIуру бур луттирду чанну букI­лакIаврил, библиотекалул фонд, нажагь дакъа, цIу дуккан къадуллалаврил хIакъираву. ЦIана ва библиотекалул фондраву 23 азаруннийн бивсса луттирду бур. Розал бусласимунийн бувну, ларгсса шинал биб­лиотекалун 24 лу буллуну бур, мунияр хьхьичI – 25. Гьашину тIурча, бувагу 14 лу буллуну бур. Чанну дур дагъусттаннал литература. Чанну букIлай бур кказит-журналлу.

— Гьарца дачIи шинай заказ дулайссар, амма тIалав бувсса луттирду циняв къабучIай, — тIий бур биб­лиотекалул хъунмур.
МахIачкъалаллал ЦБС-рал 20-мур библиотекалущал дус хьун ччисса ухьурча, бухьхьияра, пашман къахьунтIиссару. Луттирдал тIитIинтIиссар зун караматсса дуниял.
Библиотека зий бур ссят 11.00-нния ссят 19.00-ннийн бияннин, ляхчIун дакъанура.

АлхIат кьини — выходной
Жул адрес:
МахIачкъала, Ирчи-Къазаклул цIанийсса кIичIиравалу, №30.